ന്യൂഡൽഹി: സൈന്യത്തിൽ ചേരണമെന്ന മോഹവുമായി അർദ്ധരാത്രി ഓടി പരിശീലനം നടത്തിയ 19കാരനാണ് ഇപ്പോൾ സോഷ്യൽ മീഡിയയിലെ താരം. സംവിധായകൻ വിനോദ് കാപ്രി പങ്കുവെച്ച വീഡിയോ ഹിറ്റായതോടെയായിരുന്നു ഒറ്റരാത്രികൊണ്ട് പ്രദീപ് മെഹ്‌റ തരംഗമായത്. ഇന്നലെവരെ പ്രദീപിനെ ആർക്കും അറിയുമായിരുന്നില്ല. എന്നാലിന്ന് നിശ്ചയദാർഢ്യമുള്ള 19കാരനെ രാജ്യം മുഴുവനുമറിയാം..
ജീവിതത്തിലെ പ്രാരാബ്ധങ്ങൾ മൂലം പരിശീലനത്തിന് സമയം ലഭിക്കാത്തതിനാൽ അർദ്ധരാത്രി ജോലി കഴിഞ്ഞ് മടങ്ങവേ സൈന്യത്തിൽ ചേരാൻ പരിശീലനം നടത്തുന്ന പ്രദീപിന് രാജ്യത്തിന്റെ നാനാഭാഗത്ത് നിന്നും അഭിനന്ദന പ്രവാഹമാണ്. അതിനിടെയാണ് റിട്ടയേർഡ് ജനറൽ സതീഷ് ദുവ 19കാരന് അഭിനന്ദനവും സഹായവുമായി എത്തിയിരിക്കുന്നത്.
പ്രദീപിന്റെ ഓട്ടം ട്വിറ്ററിൽ പങ്കുവെച്ച ജനറൽ സതീഷ് ദുവ 19കാരന്റെ പ്രകടനം അഭിനന്ദനാർഹമാണെന്ന് രേഖപ്പെടുത്തി. ആർമി റിക്രൂട്ട്‌മെന്റ് മറികടക്കാൻ പ്രദീപിനെ സഹായിക്കുമെന്നും ഇക്കാര്യം ഈസ്റ്റേൺ ആർമി കമാൻഡറും കുമൗൺ റെജിമെന്റിലെ കേണലുമായ ജനറൽ റാണ കലിത്തയോട് സംസാരിച്ചിട്ടുണ്ടെന്നും അദ്ദേഹം അറിയിച്ചു. പ്രദീപിന്റെ റിക്രൂട്ട്‌മെന്റിന് വേണ്ട നടപടികൾ ഈസ്റ്റേൺ ആർമി കമാൻഡർ കൈക്കൊള്ളുമെന്നും ജനറൽ സതീഷ് ദുവ വ്യക്തമാക്കി.
His Josh is commendable, and to help him pass the recruitment tests on his merit, I've interacted with Colonel of KUMAON Regiment, Lt Gen Rana Kalita, the Eastern Army Commander. He is doing the needful to train the boy for recruitment into his Regiment.
Jai Hind 🇮🇳 https://t.co/iasbkQvvII— Lt Gen Satish Dua 🇮🇳 (@TheSatishDua) March 21, 2022
ആർമിയിൽ ചേരണമെന്നായിരുന്നു പ്രദീപിന്റെ നാളുകളായുള്ള മോഹം. ഇതിന് വേണ്ടി രാത്രിയാണ് പ്രദീപ് സമയം കണ്ടെത്തിയിരുന്നത്. ജോലി സ്ഥലത്ത് നിന്നും വീട്ടിലേക്ക് മടങ്ങവേ ദിവസേന പത്ത് കിലോമീറ്റർ ദൂരം ഓടിയാണ് പ്രദീപ് പരിശീലനം നടത്തിയിരുന്നത്. ഇതിന്റെ ദൃശ്യങ്ങൾ വൈറലായതോടെ പ്രദീപിന് ആശംസകളുമായി നിരവധി പേരെത്തിയിരുന്നു. തന്റെ പ്രശ്‌നങ്ങളെക്കുറിച്ചുള്ള വേവലാതിയില്ല, മറിച്ച് നാളെയെക്കുറിച്ചുള്ള പ്രതീക്ഷകളാണ് ഈ കൊച്ചുമിടുക്കന്റെ മനം നിറയെ എന്ന് പ്രശംസിച്ചവർ അഭിപ്രായപ്പെട്ടു.
