തിരുവനന്തപുരം: സംസ്ഥാനത്ത് ഓട്ടോ-ടാക്സി നിരക്ക് വർദ്ധിപ്പിക്കേണ്ട സാഹചര്യമെന്ന് ഗതാഗതമന്ത്രി ആന്റണി രാജു. ടാക്സി നിരക്ക് മിനിമം 175 രൂപയിൽ നിന്ന് 210 രൂപയായി ഉയർത്താനും, ഓട്ടോ മിനിമം ചാർജ് 25 രൂപയിൽ നിന്ന് 30 ആയി ഉയർത്താനുമാണ് ജസ്റ്റിസ് രാമചന്ദ്രൻ കമ്മിറ്റിയുടെ ശുപാർശ.
‘ഓട്ടോ-ടാക്സികൾക്ക് നിരക്ക് വർദ്ധിപ്പിക്കുന്നതിന് നിർദ്ദേശങ്ങൾ നൽകുന്നതിനായി ജസ്റ്റിസ് രാമചന്ദ്രൻ കമ്മിറ്റിയോട് ആവശ്യപ്പെട്ടിരുന്നു. ഒന്നര കിലോമീറ്റർ ദൂരത്തിന് 25 രൂപയാണ് ഓട്ടോറിക്ഷകൾക്ക് മിനിമം ചാർജ്. ഇത് 40 രൂപയായി ഉയർത്താനാണ് ഓട്ടോ തൊഴിലാളി യൂണിയൻ ആവശ്യപ്പെട്ടത്. എന്നാൽ കമ്മിറ്റിയുടെ നിർദ്ദേശപ്രകാരം ഒന്നര കിലോമീറ്റർ ദൂരം സഞ്ചരിക്കാൻ 30 രൂപ മിനിമം ചാർജ് ആക്കാനാണ്’ മന്ത്രി വ്യക്തമാക്കി.
ടാക്സികളെ സംബന്ധിച്ചിടത്തോളം 1500 സിസി വരെയുള്ള കാറുകൾക്ക് 5 കിലോമീറ്റർ ദൂരം സഞ്ചരിക്കാൻ 175 രൂപയാണ് മിനിമം ചാർജ്. അത് 210 ആയി ഉയർത്താനാണ് ജസ്റ്റിസ് രാമചന്ദ്രൻ കമ്മിറ്റിയുടെ ശുപാർശ എന്നും മന്ത്രി കൂട്ടിച്ചേർത്തു.
അതേസമയം, വെയിറ്റിംഗ് ചാർജ് ഉയർത്തേണ്ട ആവശ്യമില്ലെന്നാണ് കമ്മിറ്റി അറിയിച്ചത്. കമ്മിറ്റിയുടെ ശുപാർശകൾ സർക്കാർ വിലയിരുത്തിയ ശേഷം നിരക്ക് വർദ്ധനവ് പ്രഖ്യാപിക്കുമെന്ന് മന്ത്രി വ്യക്തമാക്കി.
