സൊമാലിയന് നഗരമായ ബെലെഡ്വെയ്നിലുള്ള ചാവേര് ആക്രമണത്തില് വനിതാ എംപി കൊല്ലപ്പെട്ടു. അമിന മുഹമ്മദ് അബ്ദി എന്ന യുവതിയാണ് കൊല്ലപ്പെട്ടത്. സ്റ്റേറ്റ് പ്രസിഡന്റിന്റെ വസതിക്ക് സമീപത്ത് വച്ചാണ് അപകടം ഉണ്ടായത്. അമിനയുടെ സമീപത്ത് എത്തിയ ഭീകരന് പൊട്ടിത്തെറിക്കുകയായിരുന്നു. അല് ഷബാബ് ഭീകരരാണ് ഇതിന് പിന്നിലെന്നാണ് സൂചന.
രാജ്യത്ത് കഴിഞ്ഞ കുറച്ച് നാളുകളായി അല്-ഷബാബ് ഭീകരരുടെ ആക്രമണം രൂക്ഷമായിരിക്കുകയാണ്. ബുധനാഴ്ച രാജ്യത്ത് ഉണ്ടായ രണ്ട് ഭീകരാക്രമണങ്ങളിലായി ഏഴ് പേരാണ് കൊല്ലപ്പെട്ടത്. നിരവധി പേര്ക്ക് പരിക്കേല്ക്കുകയും ചെയ്തു. രാജ്യതലസ്ഥാനമായ മൊഗദിഷുവിലെ അന്താരാഷ്ട്ര വിമാനത്താവളത്തിന് സമീപമുള്ള സൊമാലി മിലിട്ടറി ബേസിലുണ്ടായ ആക്രമണത്തില് ആറ് പേരാണ് കൊല്ലപ്പെട്ടത്. അഞ്ച് വിദേശികളും ഒരു സൊമാലിയന് പൗരനുമാണ് കൊല്ലപ്പെട്ടത്. രണ്ട് ഭീകരര് ഇവിടേക്ക് എത്തി സൈനികര്ക്ക് നേരെ നിറയൊഴിക്കുകയായിരുന്നു. ആക്രമണം നടത്തിയ രണ്ട് ഭീകരരേയും സുരക്ഷാ ഉദ്യോഗസ്ഥര് വെടിവച്ചു കൊന്നതായി പോലീസ് വക്താവ് മേജര് അബ്ദിഫത്ത ഏദന് ഹസന് പറഞ്ഞു.
ഭീകരര് ഇവിടേക്ക് അതിക്രമിച്ച് കടക്കുകയായിരുന്നു. അമിസോമിലെ സൈനികനാണ് കൊല്ലപ്പെട്ട വിദേശികളില് ഒരാള്. മറ്റ് നാല് പേര് ട്രെയിനിങ്ങിന്റെ ഭാഗമായി ഇവിടെ എത്തിയതാണ്. അല്-ഖ്വയ്ദയുമായി ചേര്ന്ന് പ്രവര്ത്തിക്കുന്ന ഭീകരസംഘടനയാണ് അല് ഷബാബ്. 2009ല് അല് ഷബാബ് ഭീകരര് മൊഗാദിഷും അന്താരാഷ്ട്ര വിമാനത്താവളത്തില് ആക്രമണം നടത്തിയിട്ടുണ്ട്.
രാജ്യത്ത് തുടരെ ഉണ്ടാകുന്ന ആക്രമണങ്ങളെ പ്രസിഡന്റ് മുഹമ്മദ് അബ്ദുല്ലാഹി മുഹമ്മദ് ശക്തമായി അപലപിച്ചു. കരുണയില്ലാത്ത തീവ്രവാദമാണ് നടക്കുന്നതെന്ന് അദ്ദേഹം പറഞ്ഞു. ആക്രമണത്തില് കൊല്ലപ്പെട്ടവരുടെ കുടുംബത്തിന്റെ ദു:ഖത്തില് പങ്കുചേരുന്നതായും അദ്ദേഹം അറിയിച്ചു. കഴിഞ്ഞ ആഴ്ച സൊമാലിയന് നഗരമായ ബെലഡ്വെയ്നിലും രണ്ട് സ്ഫോടനങ്ങള് നടന്നിരുന്നു. നിരവധി പേരാണ് ഈ ആക്രമണത്തില് കൊല്ലപ്പെട്ടത്. ഇതിന്റെ ഉത്തരവാദിത്തവും അല് ഷബാബ് ഏറ്റെടുത്തിട്ടുണ്ട്.
