തിരുവനന്തപുരം: 26-ാമത് രാജ്യാന്തര ചലച്ചിത്ര മേളയ്ക്ക് ഇന്ന് കൊടിയിറക്കം. സമാപന സമ്മേളനം ഇന്ന് വൈകിട്ട് 5.45ന് നിശാഗന്ധി ഓഡിറ്റോറിയത്തിൽ വെച്ച് നടക്കും. മന്ത്രി കെ.എൻ ബാലഗോപാൽ സമ്മേളനം ഉദ്ഘാടനം ചെയ്യും. ബോളിവുഡ് താരം നവാസുദ്ദീൻ സിദ്ധീഖിയാണ് ചടങ്ങിലെ മുഖ്യാതിഥി. എഴുത്തുകാരൻ ടി.പത്മനാഭൻ വിശിഷ്ടാതിഥിയാകും.
സമാപന സമ്മേളനത്തിൽ സാംസ്കാരിക മന്ത്രി സജി ചെറിയാൻ ചലച്ചിത്ര പുരസ്കാരങ്ങൾ സമ്മാനിക്കും. സഹകരണമന്ത്രി വി.എൻ വാസവൻ മാദ്ധ്യമ അവാർഡും വിതരണം ചെയ്യും. അഡ്വ.വി.കെ പ്രശാന്ത് എംഎൽഎ, ചലച്ചിത്ര അക്കാഡമി ചെയർമാൻ രഞ്ജിത്ത്, സെക്രട്ടറി സി.അജോയ്, വൈസ് ചെയർമാൻ പ്രേം കുമാർ, ആർട്ടിസ്റ്റിക് ഡയറക്ടർ ബീന പോൾ എന്നിവർ സമ്മേളനത്തിൽ പങ്കെടുക്കും.
മധുശ്രീ നാരായണൻ, രാജലക്ഷ്മി എന്നിവരുടെ ഫ്യൂഷൻ സംഗീത സന്ധ്യയോടെയാണ് സമാപന ചടങ്ങുകൾ ആരംഭിക്കുന്നത്. മേളയിൽ ഇന്ന് സുവർണ ചകോരം നേടിയ ചിത്രം പ്രദർശിപ്പിക്കും. മാർച്ച് 18ന് ആരംഭിച്ച ചലച്ചിത്ര മേളയിൽ അന്താരാഷ്ട്ര തലത്തിൽ നിരവധി പുരസ്കാരങ്ങൾ വാരിക്കൂട്ടിയ ചിത്രങ്ങൾ ഉൾപ്പെടെ 173 സിനിമകളാണ് ഇക്കുറി മേളയിൽ പ്രദർശിപ്പിച്ചത്.
