കൊച്ചി : കെ റെിയിലിനെതിരെ നടക്കുന്ന പ്രതിഷേധത്തിൽ പങ്കെടുത്ത സിപിഐ നേതാവിനെതിരെ നടപടിയുമായി പാർട്ടി. പിറവം ലോക്കൽ കമ്മിറ്റി സെക്രട്ടറി കെ.സി. തങ്കച്ചന് എതിരെയാണ് പാർട്ടി നടപടി. തങ്കച്ചനെ ലോക്കൽ കമ്മിറ്റി സെക്രട്ടറി സ്ഥാനത്ത് നിന്നും മണ്ഡലം കമ്മിറ്റി അംഗത്വത്തിൽ നിന്നും പുറത്താക്കി.
കെ റെയിൽ വിരുദ്ധ പ്രതിഷേധത്തിൽ പങ്കെടുത്തിന് തങ്കച്ചനോട് പാർട്ടി വിശദീകരണം തേടിയിരുന്നു. തുടർന്ന് തങ്കച്ചൻ വിശദീകരണം നൽകുകയും ചെയ്തു. കോൺഗ്രസ് നേതാക്കൾ ഉൾപ്പെട്ട സമരരംഗത്ത് താൻ എത്തിയത് തെറ്റായിരുന്നെന്ന് തങ്കച്ചൻ പാർട്ടിയിൽ സമ്മതിച്ചിരുന്നു. എന്നാൽ ഈ വിശദീകരണം തൃപ്തികരമല്ലാതെ വന്നതോടെയാണ് നേതാവിനെതിരെ നടപടി സ്വീകരിച്ചത്. ശനിയാഴ്ച ചേർന്ന മണ്ഡലം കമ്മിറ്റിയുടേതാണ് നടപടി.
തങ്കച്ചന് പകരം മറ്റൊരാളെ ആ സ്ഥാനത്തേക്ക് നിയോഗിച്ചു. പിറവത്തെ മുതിർന്ന നേതാവാണ് തങ്കച്ചൻ. അതിനാലാണ് പുറത്താക്കൽ ഉൾപ്പെടെയുള്ള കടുത്ത നടപടികൾ ഉണ്ടാകാതിരുന്നത്.
