ന്യൂഡൽഹി: ഡൽഹിയിൽ ഇന്ന് സീസണിലെ ഏറ്റവും ഉയർന്ന താപനില രേഖപ്പെടുത്തി. 39.2 ഡിഗ്രിസെൽഷ്യസ് ആണ് ഇന്നത്തെ താപനില. അന്തരീക്ഷത്തിൽ മെർക്കുറി ഉയരുന്ന സാഹചര്യത്തിൽ വരും ദിവസങ്ങളിൽ ഡൽഹി കടുത്ത ചൂടിന് സാക്ഷ്യം വഹിക്കും. ഇന്നത്തെ കുറഞ്ഞ താപനില 18.8 ഡിഗ്രി സെൽഷ്യസ്.
കാലാവസ്ഥ വകുപ്പിന്റെ കണക്കനുസരിച്ച് സഫ്ദർജംഗ് ഒബ്‌സർവേറ്ററിയിൽ താപനില 39.2 ഡിഗ്രി സെൽഷ്യസാണ് രേഖപ്പെടുത്തിയത്. സീസണിലെ ശരാശരിയേക്കാൾ ഏഴ് പോയിന്റ് കൂടുതലാണ് ഇത്. കുറഞ്ഞ താപനില 18.8 ഡിഗ്രി സെൽഷ്യസ്. ഇത് സാധാരണയേക്കാൾ കൂടുതലാണെന്ന് കാലാവസ്ഥ കേന്ദ്രം അറിയിച്ചു. അടുത്ത നാലഞ്ച് ദിവസങ്ങളിൽ വടക്ക് പടിഞ്ഞാറ്, മധ്യ, പടിഞ്ഞാറ് മേഖലയിൽ ഉഷ്ണതരംഗം തുടരാൻ സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.
അടുത്ത 24 മണിക്കൂറിനുള്ളിൽ വടക്കുപടിഞ്ഞാറൻ ഇന്ത്യയുടെ മിക്ക ഭാഗങ്ങളിലും ഉയർന്ന താപനിലയിൽ കാര്യമായ മാറ്റമൊന്നും ഉണ്ടാകില്ല. അതിനുശേഷം വടക്കുപടിഞ്ഞാറൻ ഇന്ത്യയുടെ സമതലങ്ങളിൽ ഏകദേശം രണ്ട് ഡിഗ്രി സെൽഷ്യസ് കുറയും.
അടുത്ത മൂന്നു ദിവസങ്ങളിൽ മധ്യ, കിഴക്കൻ ഇന്ത്യയുടെ പല ഭാഗങ്ങളിലും പരമാവധി താപനിലയിൽ രണ്ട് ഡിഗ്രി സെൽഷ്യസ് എന്ന തോതിൽ വർദ്ധനവിന് സാധ്യതയുണ്ട്. അടുത്ത രണ്ട് ദിവസങ്ങളിൽ ഗുജറാത്തിന്റെ മിക്ക ഭാഗങ്ങളിലും കൂടിയ താപനിലയിൽ കാര്യമായ മാറ്റമൊന്നും ഉണ്ടാകാൻ സാധ്യതയില്ല, അതിനുശേഷം ക്രമേണ രണ്ട് മൂന്ന് ഡിഗ്രി സെൽഷ്യസ് വർദ്ധിക്കും.
അടുത്ത അഞ്ചു ദിവസങ്ങളിൽ മഹാരാഷ്‌ട്രയിൽ പരമാവധി താപനിലയിൽ രണ്ട് മൂന്ന് ഡിഗ്രിസെൽഷ്യസ് വർദ്ധനവ് ഉണ്ടാകാൻ സാധ്യതയുണ്ട്. എന്നാൽ അടുത്ത അഞ്ച് ദിവസങ്ങളിൽ രാജ്യത്തിന്റെ മറ്റ് ഭാഗങ്ങളിൽ താപനിലയിൽ കാര്യമായ മാറ്റമൊന്നും ഉണ്ടാകാൻ സാധ്യതയില്ല.
