തിരുവനന്തപുരം: സംസ്ഥാനത്ത് പരീക്ഷയ്‌ക്കെത്തുന്ന കുട്ടികൾ മാസ്‌ക് ധരിക്കണമെന്ന് ആവശ്യപ്പെടുന്നുണ്ടെങ്കിലും കർശന മാനദണ്ഡങ്ങളുടെ പട്ടികയിൽ ഉൾപ്പെടുത്തിയിട്ടില്ല. പരീക്ഷ നടത്തിപ്പ് കൊറോണ മാനദണ്ഡങ്ങൾ പാലിച്ചാകണമെന്ന ഒറ്റവരി നിർദേശം മാത്രമാണ് സ്‌കൂളുകൾക്ക് വിദ്യാഭ്യാസ വകുപ്പ് പുറപ്പെടുവിച്ചിരിക്കുന്നത്.
കഴിഞ്ഞ വർഷം കർശന മാനദണ്ഡങ്ങളോടെയാണ് പരീക്ഷ നടന്നിരുന്നത്. സാമൂഹിക അകലം പാലിക്കുന്നുണ്ടെന്നും മാസ്‌ക് ധരിച്ചിട്ടുണ്ടെന്നും ഉറപ്പുവരുത്തിയിട്ടായിരുന്നു പരീക്ഷകൾ നടന്നിരുന്നത്. എന്നാൽ ഇത്തവണ പ്രതിദിന കൊറോണ രോഗികൾ ഗണ്യമായി കുറഞ്ഞതിന്റെ പശ്ചാത്തലത്തിൽ ആരോഗ്യവകുപ്പും വിദ്യാഭ്യാസ വകുപ്പും നിയന്ത്രണങ്ങൾ ലഘൂകരിച്ചു.
അതേസമയം കൊറോണ ലക്ഷണമുള്ളവർക്കും രോഗ ബാധിതർക്കും പരീക്ഷയെഴുതാൻ പ്രത്യേക സജ്ജീകരണങ്ങൾ സ്‌കൂളുകളിൽ തയ്യാറാക്കിയിട്ടുണ്ട്. നാളെ മുതലാണ് രണ്ടാം വർഷ ഹയർസെക്കൻഡറി, വൊക്കേഷണൽ സെക്കൻഡറി പരീക്ഷകൾ ആരംഭിക്കുന്നത്. ഏപ്രിൽ 26 വരെയാണ് പരീക്ഷ.
