ദുബായ്: ഓൾറൗണ്ടർമാരുടെ ഏറ്റവും പുതിയ ഐസിസി ടെസ്റ്റ് ക്രിക്കറ്റ് റാങ്കിംഗ് പട്ടികയിൽ രണ്ടാം സ്ഥാനത്തെത്തി ഇന്ത്യയുടെ രവിചന്ദ്രൻ അശ്വിൻ. വെസ്റ്റിൻഡീസ് താരം ജേസൺ ഹോൾഡറിനെ പിന്തള്ളിയാണ് അശ്വിൻ രണ്ടാം സ്ഥാനത്തെത്തിയത്. പട്ടികയിൽ ഇന്ത്യയുടെ ജഡേജയാണ് ഒന്നാം സ്ഥാനത്തുള്ളത്.
341 ആണ് അശ്വിന്റെ ടെസ്റ്റ് റാങ്കിംഗ്. ജഡേജയുടേത് 385 ആണ്. ഗ്രെനഡയിൽ നടന്ന ടെസ്റ്റ് ക്രിക്കറ്റിലെ പ്രകടനത്തിന് ശേഷം വെസ്റ്റിൻഡീസ് താരം കൈൽ മേയേഴ്സ് 11-ാം സ്ഥാനത്തെത്തി. നേരത്തെ 29-ാം സ്ഥാനത്തായിരുന്നു കൈൽ മേയേഴ്സ്. 198 ആണ് മേയേഴ്സിന്റെ റാങ്കിംഗ്.
ബാറ്റർമാരിൽ, പാകിസ്താനെതിരായ മിന്നും പ്രകടനമാണ് ഓസ്ട്രേലിയയുടെ ഉസ്മാൻ ഖവാജയ്ക്ക് ടെസ്റ്റ് റാങ്കിംഗിൽ 7-ാം സ്ഥാനത്തെത്താൻ സഹായമായത്. ബാറ്റർമാരുടെ പട്ടികയിൽ ഓസ്ട്രേലിയൻ താരം മാർനസ് ലാബുഷാഗ്നെയാണ് ഒന്നാം സ്ഥാനത്തുള്ളത്. പട്ടികയിൽ ആദ്യ പത്തിൽ ഇന്ത്യൻ താരങ്ങളായ രോഹിത് ശർമ്മയും വിരാട് കോഹ്ലിയുമുണ്ട്.
ടെസ്റ്റ് ബൗളിംഗ് റാങ്കിംഗിൽ ഓസ്ട്രേലിയയുടെ പാറ്റ് ക്യുമ്മിൻസാണ് ഒന്നാം സ്ഥാനത്ത്. രണ്ടാം സ്ഥാനത്തുള്ളത് ഇന്ത്യൻ താരം അശ്വിനാണ്. കൂടാതെ നാലാം സ്ഥാനത്ത് ഇന്ത്യയുടെ ബൂമ്രയും ആദ്യ പത്തിൽ ഇടം പിടിച്ചിട്ടുണ്ട്.
