ന്യൂഡൽഹി : പുതിയ സാമ്പത്തിക വർഷം ഇന്ന് ആരംഭിക്കുന്നതോടൊപ്പം മരുന്നുകൾക്കും വില കൂടുന്നു. ജീവൻരക്ഷയ്ക്കുള്ളത് ഉൾപ്പെടെ 872 മരുന്നുകൾക്കാണ് ഇന്ന് മുതൽ വില വർദ്ധിക്കുന്നത്.
10.76% വരെയുള്ള വിലവർധനയാണ് ഇന്ന് നിലവിൽ വരുന്നത്. പാരസെറ്റമോൾ ഗുളിക ഒന്നിന് (500 മില്ലിഗ്രാം) 0.91 രൂപയെന്നത് 1.01 രൂപ വരെയാകും. മൊത്തവില സൂചികയുടെ അടിസ്ഥാനത്തിലാണ് ചില്ലറ വിൽപനയ്ക്കുള്ള വിലയും നിർണയിക്കുന്നത്. നേരത്തെ മൊത്തവില നാലു ശതമാനംവരെ കൂടിയപ്പോൾ ചില്ലറ വിലയിൽ മാറ്റമുണ്ടായിരുന്നില്ല. എന്നാൽ ഇത്തവണത്തെ പത്തുശതമാനത്തിലധികം വർധന ചില്ലറവിലയിലും പ്രതിഫലിക്കും.
പനി, ഇൻഫക്ഷനുകൾ, ഹൃദ്രോഗം, ഉയർന്ന രക്തസമ്മർദം, ത്വക് രോഗങ്ങൾ, അനീമിയ തുടങ്ങിയവയ്ക്കുള്ള മരുന്നുകളുടെ വിലയാണ് ഉയർന്നത്. ഫിനോർബാർബിറ്റോൺ, ഫിനൈറ്റോയിൻ സോഡിയം, അസിത്രോമൈസിൻ, ഫോളിക് ആസിഡ് എന്നിവയും വിലകൂടുന്ന മരുന്നുകളുടെ പട്ടികയിലുണ്ട്. മരുന്നുകൾക്ക് പുറമേ നീ ഇംപ്ലാൻറ്സ്, കൊറോണറി സ്റ്റെൻറ് എന്നിവയുടെ വിലയും കൂടും.
Comments