പരീക്ഷ ഉത്സവമാക്കണം;കോപ്പിയടിക്കേണ്ട ആവശ്യമില്ല,നിങ്ങൾ ചെയ്യുന്നതെന്തും ആത്മവിശ്വാസത്തോടെ ചെയ്യുക; വിദ്യാർത്ഥികൾക്ക് ആത്മവിശ്വാസം പകർന്ന് പ്രധാനമന്ത്രി
ന്യൂഡൽഹി: പരീക്ഷാ പേ ചർച്ചയുടെ അഞ്ചാം പതിപ്പിൽ വിദ്യാർത്ഥികൾക്ക് ആത്മവിശ്വാസവും നിർദ്ദേശങ്ങളും നൽകി പ്രധാനമന്ത്രി നരേന്ദ്ര മോദി. പരീക്ഷാ സമയത്ത് പരിഭ്രാന്തി നിറഞ്ഞ അന്തരീക്ഷത്തിൽ നിന്ന് വിട്ട് നിൽക്കണമെന്ന് അദ്ദേഹം നിർദ്ദേശിച്ചു. കോപ്പിയടിക്കേണ്ട ആവശ്യമില്ലെന്നും നിങ്ങൾ ചെയ്യുന്നതെന്തും പൂർണ ആത്മവിശ്വാസത്തോടെ ചെയ്യുകയെന്നും പ്രധാനമന്ത്രി പറഞ്ഞു.
പരീക്ഷ ഒരു ഉത്സവമായി മാറ്റി മുന്നോട്ട് പോകാൻ അദ്ദേഹം നിർദ്ദേശിച്ചു. പരീക്ഷകൾ നമ്മുടെ ജീവിതത്തിലെ ഒരു പ്രധാന ചവിട്ടുപടിയാണെന്ന് അദ്ദേഹം പറഞ്ഞു.ഒരു വിഷയത്തിലൂന്നി പഠിച്ചാൽ സമൂഹമാദ്ധ്യമങ്ങൾ പ്രശ്നക്കാരനാവില്ലെന്ന് അദ്ദേഹം പറഞ്ഞു.ഓൺലൈനിൽ പഠിക്കുമ്പോൾ പഠിക്കുകയാണോ അതോ സോഷ്യൽ മീഡിയയിൽ സമയം ചെലവഴിക്കുകയാണോ ചെയ്യുന്നതെന്ന് ആത്മപരിശോധന നടത്തണമെന്ന് അദ്ദേഹം വിദ്യാർത്ഥികൾക്ക് നിർദ്ദേശം നൽകി.
സമയക്കുറവ് മൂലം പരീക്ഷാ പേയിൽ ചർച്ച ചെയ്യപ്പെടാതെ പോകുന്ന വിദ്യാർത്ഥികളുടെ എല്ലാ ചോദ്യത്തിനും നമോ ആപ്പിൽ വീഡിയോകളിലൂടെയും ഓഡിയോ സന്ദേശങ്ങളിലൂടെയും മറുപടി നൽകുമെന്ന് അദ്ദേഹം വ്യക്തമാക്കി.നീണ്ട ഇടവേളയ്ക്ക് ശേഷം എല്ലാവരേയും കണ്ടെതിൽ സന്തോഷമുണ്ടെന്ന് പ്രധാനമന്ത്രി പറഞ്ഞു.
രാജ്യതലസ്ഥാന നഗരിയിൽ പ്രത്യേകം ക്ഷണിക്കപ്പെട്ട സ്കൂൾ വിദ്യാർത്ഥികൾളും അദ്ധ്യാപകരും പ്രധാനമന്ത്രിയ്ക്കൊപ്പം രാജ്ഭവനിലെ പ്രത്യേക അങ്കണത്തിൽ വെച്ച് നടക്കുന്ന പരീക്ഷാ പേ ചർച്ചയിൽ പങ്കെടുക്കുന്നുണ്ട്. രാജ്യത്തിന്റേയും ലോകത്തിന്റേയും വിവിധ മേഖലകളിലെ കുട്ടികൾ വെർച്വലായിട്ടാണ് പതിവുപോലെ പ്രധാനമന്ത്രിക്കൊപ്പം സംവാദത്തിൽ പങ്കെടുക്കുന്നുണ്ട്.
