ന്യൂഡൽഹി: അദാനി ഗ്രൂപ്പ് ചെയർമാൻ ഗൗതം അദാനി വീണ്ടും ഏഷ്യയിലെ ഏറ്റവും വലിയ ധനികനായി. റിലയൻസ് ഇൻഡസ്ട്രീസ് ചെയർമാൻ അംബാനിയെ പിന്തള്ളിയാണ് 100 ബില്യൺ ഡോളറിന്റെ ആസ്തിയുള്ള അദാനി ഏഷ്യയിലെ ഏറ്റവും വലിയ ധനികനായത്. ആഗോള സൂചികയിൽ അദാനി പത്താം സ്ഥാനത്തും അംബാനി പതിനൊന്നാം സ്ഥാനത്തുമാണ്.
കഴിഞ്ഞ വർഷം 23.5 ബില്യൺ ഡോളറാണ് അദാനി തന്റെ സമ്പത്തിലേക്ക് കൂട്ടിച്ചേർത്തത്. ഇതേ കാലയളവിൽ 9.03 ബില്യൺ ഡോളറാണ് അംബാനി തന്റെ ആസ്തിയിൽ കൂട്ടിച്ചേർത്തത്. ബ്ലൂംബെർഗ് ബില്യണയേഴ്സ് ഇൻഡക്സ് നൽകുന്ന കണക്കാണിത്.
അദാനി ഗ്രൂപ്പിന്റെ സ്ഥാപകനും 59-കാരനായ ശതകോടീശ്വരനുമായ ഗൗതം അദാനി തുറമുഖങ്ങളും എയ്റോസ്പേസും മുതൽ താപവൈദ്യുത വിതരണ നിലയങ്ങൾ വരെ നിയന്ത്രിക്കുന്നയാളാണ്. അദാനി ഗ്രൂപ്പിന് കീഴിൽ അദാനി എന്റർപ്രൈസസ്, അദാനി പോർട്‌സ് ആൻഡ് ലോജിസ്റ്റിക്‌സ്, അദാനി പവർ, അദാനി ട്രാൻസ്മിഷൻ, അദാനി ഗ്രീൻ, അദാനി ഗ്യാസ് എന്നീ സ്ഥാപനങ്ങളുണ്ട്.
ടെസ്ലയുടെ ഇലോൺ മസ്‌കാണ് 273 ബില്യൺ ഡോളർ ആസ്തിയുമായി ലോകത്തിലെ ഏറ്റവും ധനികനായി തുടരുന്നത്. 188 ബില്യൺ ഡോളർ ആസ്തിയുമായി ആമസോണിന്റെ ജെഫ് ബെസോസ് രണ്ടാം സ്ഥാനത്തുണ്ട്.
