ന്യൂഡൽഹി: രാജ്യതലസ്ഥാനത്തെ യുഎസ് എംബസിയ്ക്ക് പുറത്ത് അമേരിക്കൻ പ്രസിഡന്റ് ജോ ബൈഡനെതിരായ മുദ്രാവാക്യങ്ങളുമായി പോസ്റ്റർ പതിപ്പിച്ച സംഭവത്തിൽ ഒരാൾ പോലീസ് പിടിയിൽ. അർജുൻ നഗർ സ്വദേശിയായ പവൻ കുമാർ എന്നയാളാണ് പോലീസ് പിടിയിലായത്.
‘ഇന്ത്യയെ ഭീഷണിപ്പെടുത്തുന്നത് നിർത്തുക’ എന്നാണ് പോസ്റ്ററിൽ പറയുന്നത്. ‘ഇന്ത്യയ്ക്ക് അമേരിക്കയുടെ ഒരു സഹായവും ആവശ്യമില്ല. ചൈനയ്ക്കെതിരെ പോരാടാൻ അമേരിക്കയ്ക്ക് ഇന്ത്യയുടെ സഹായമാണ് ആവശ്യം. ഞങ്ങളുടെ ധീരരായ സായുധ സേനയെ കുറിച്ചോർത്ത് ഞങ്ങൾ അഭിമാനിക്കുന്നു. ജയ് ജവാൻ ജയ് ഭാരത്’ എന്നാണ് പോസ്റ്ററിൽ എഴുതിയിരിക്കുന്നത്.
സംഭവത്തിൽ പോലീസ് അന്വേഷണം ആരംഭിച്ചു. ഇത്തരത്തിലൊരു പോസ്റ്റർ പതിപ്പിയ്ക്കാനുള്ള കാരണം ഇനിയും വ്യക്തമല്ലെന്നും, ഇയാളെ ചോദ്യം ചെയ്ത ശേഷം മറ്റ് വിവരങ്ങൾ പുറത്ത് വിടുമെന്നും പോലീസ് അറിയിച്ചു.
