ന്യൂഡൽഹി: 64-ാമത് ഗ്രാമി പുരസ്കാര വേദിയിൽ തിളങ്ങിയ ഇന്ത്യൻ-അമേരിക്കൻ ഗായിക ഫാൽഗുനി ഷായ്ക്ക് അഭിനന്ദനങ്ങൾ നേർന്ന് പ്രധാനമന്ത്രി നരേന്ദ്ര മോദി. ബെസ്റ്റ് ചിൽഡ്രൻസ് മ്യൂസിക് വിഭാഗത്തിലാണ് ഫാൽഗുനി ഷാ ഗ്രാമി പുരസ്കാം നേടിയത്. ഫാൽഗുനിയുടെ ‘എ കളർഫുൾ വേൾഡ്’ എന്ന ആൽബത്തിനാണ് പുരസ്കാരം.
‘ഗ്രാമി 2022ൽ കുട്ടികളുടെ മികച്ച സംഗീത ആൽബത്തിനുള്ള അവാർഡ് നേടിയ ഫാൽഗുനി ഷായ്ക്ക് അഭിനന്ദനങ്ങൾ. അവളുടെ ഭാവി ഉദ്യമങ്ങൾക്ക് ആശംസകൾ നേരുന്നു. ഇനിയും ഉന്നതങ്ങളിലേയ്ക്ക് അവളുടെ കീർത്തി എത്തട്ടേ’ പ്രധാനമന്ത്രി നരേന്ദ്ര മോദി ട്വിറ്ററിൽ കുറിച്ചു.
Congratulations to Falguni Shah on winning the award for the Best Children’s Music Album at the Grammys. Wishing her the very best for her future endeavours. @FaluMusic
— Narendra Modi (@narendramodi) April 5, 2022
മുംബൈയിൽ ജനിച്ച ഫാൽഗുനി ഷാ ഉസ്താദ് ജയ്പുർ ഖരാനയിൽ സുൽത്താൻ ഖാന്റെ കീഴിൽ സംഗീതം പഠിച്ചശേഷം 2000ത്തിൽ അമേരിക്കയിലേക്കു കുടിയേറി. ഫാലു എന്ന് വിളിപ്പേരുള്ള ഫാൽഗുനിയുടെ ആദ്യ ഗ്രാമി പുരസ്കാരമാണിത്. സംഗീതത്തിലെ ഓസ്കർ എന്നറിയപ്പെടുന്ന പുരസ്കാരമാണ് ഗ്രാമി പുരസ്കാരം.
2007 ലാണ് ഫാൽഗുനി തന്റെ സോളോ ആൽബം റിലീസ് ചെയ്തത്. തെക്ക് കിഴക്കൻ ഏഷ്യയിലുടനീളമുള്ള നാടോടി രീതികളെ പാശ്ചാത്യ സംഗീതവുമായി സംയോജിപ്പിച്ചാണ് ആൽബം നിർമ്മിച്ചത്. ബെസ്റ്റ് ചിൽഡ്രൻസ് മ്യൂസിക് ആൽബം എന്ന വിഭാഗത്തിലേക്ക് പേര് നാമനിർദ്ദേശം ചെയ്യപ്പെടുന്ന ആദ്യത്തെ ഇന്ത്യക്കാരി കൂടിയാണ് ഫാൽഗുനി. എആർ റഹ്മാനോടൊപ്പം ഇവർ പരിപാടിയും അവതരിപ്പിച്ചിട്ടുണ്ട്.
Comments