ന്യൂഡല്ഹി:ഉത്തര്പ്രദേശില് കനത്ത തോല്വി ഏറ്റുവാങ്ങിയതിന് പിന്നാലെ മായാവതിയ്ക്കെതിരെ രൂക്ഷ വിമര്ശനവുമായി കോണ്ഗ്രസ് നേതാവ് രാഹുല് ഗാന്ധി. തിരഞ്ഞെടുപ്പിന് മുന്പ് ബിഎസ്പിയുമായി സഖ്യത്തില് ഏര്പ്പെടാമെന്ന് വാഗ്ദാനം നല്കിയിട്ടും മായാവതി അത് നിരസിക്കുകയായിരുന്നുവെന്നാണ് രാഹുല് കുറ്റപ്പെടുത്തിയത്. ‘ മായാവതി ഉത്തര്പ്രദേശിലെ തിരഞ്ഞെടുപ്പില് മത്സരിക്കുകയായിരുന്നില്ല. സഖ്യം രൂപീകരിക്കുന്നതുമായി ബന്ധപ്പെട്ട് മായാവതിക്ക് ഒരു സന്ദേശം അയച്ചിരുന്നു. എന്നാല് അതിനോടും അവര് പ്രതികരിച്ചില്ല. ഇത്തവണ അവര് ദളിതര്ക്ക് വേണ്ടി ശബ്ദമുയര്ത്താന് തയ്യാറായില്ല. കാരണം സിബിഐയും, ഇ.ഡിയും. പെഗാസസുമെല്ലാം’ ചുറ്റും ഉണ്ടെന്നും രാഹുല് പരിഹസിച്ചു. ഒരു പുസ്തക പ്രസാധനച്ചടങ്ങില് സംസാരിക്കുകയായിരുന്നു രാഹുല്.
ഉത്തര്പ്രദേശില് ഇക്കുറി നടന്ന തിരഞ്ഞെടുപ്പില് ബിഎസ്പിയും കോണ്ഗ്രസും വലിയ തകര്ച്ചയാണ് നേരിട്ടത്. ബിഎസ്പി ഒരു സീറ്റിലും കോണ്ഗ്രസ് രണ്ട് സീറ്റിലും മാത്രമാണ് വിജയിച്ചത്. ആര്എസ്എസിനെതിരേയും രാഹുല് രൂക്ഷ വിമര്ശനമാണ് ഉന്നയിച്ചത്. ‘ നമുക്ക് ഈ ഭരണഘടനയെ സംരക്ഷിക്കണം. ഭരണഘടനയെ സംരക്ഷിക്കണമെങ്കില് ഈ രാജ്യത്തെ സംവിധാനങ്ങളെ സംരക്ഷിക്കണം. എല്ലാ ഈ രാജ്യത്തെ എല്ലാ സംവിധാനങ്ങളും ഇപ്പോള് ആര്എസ്എസിന്റെ കൈകളിലാണെന്നും’ രാഹുല് വിമര്ശിച്ചു.
തനിക്ക് അധികാരത്തോട് ലവലേശം ഭ്രമമില്ലെന്ന് രാഹുല് കഴിഞ്ഞ ദിവസം പറഞ്ഞിരുന്നു. ‘ ചില നേതാക്കളുണ്ട്, അധികാരത്തില് ഏതു വിധേയും കടിച്ച് തൂങ്ങാനാണ് അവര് ശ്രമിക്കുന്നത്. ഏതൊക്കെ രീതിയില് അധികാരം നിലനിര്ത്താം, അല്ലെങ്കില് പിടിച്ചടുക്കാം എന്നൊക്കെയായിരിക്കും അവര് രാവിലെ എണീക്കുന്നത് മുതല് ചിന്തിക്കുന്നത്, അത് കഴിഞ്ഞ് ഉറങ്ങും. അടുത്ത ദിവസവും ഇതേ കാര്യം തന്നെ ആവര്ത്തിക്കും. മറ്റൊന്നും ചെയ്യില്ല. ഞാന് ജനിച്ചത് അധികാര കേന്ദ്രത്തിലാണ്, പക്ഷേ എനിക്ക് അധികാരത്തോട് താത്പര്യം ഇല്ല. രാത്രി ഉറങ്ങാന് പോകുമ്പോള് രാജ്യത്തെ മനസിലാക്കാനാണ് ശ്രമിക്കുന്നത്. പ്രണയിക്കുന്നവരെ പോലെയാണത്. നിങ്ങള് ഒന്നിനെ പ്രേമിക്കുകയാണെങ്കില്, നിങ്ങള് അതിനെ മനസിലാക്കാന് ശ്രമിക്കുമെന്നും’ രാഹുല് പറഞ്ഞു.
