ബാഹുബലിയ്ക്ക് ശേഷം എസ്എസ് രാജമൗലി സംവിധാനം ചെയ്ത ആർആർആർ ആഗോള തലത്തിൽ 1000 കോടി രൂപ ഗ്രോസ് കളക്ഷൻ പിന്നിട്ടു. റിലീസ് ആയി മൂന്നാം ആഴ്ച്ചയിലാണ് ചിത്രത്തിന്റെ ഈ നേട്ടം. 1000 കോടി കളക്ഷനിൽ എത്തുന്ന മൂന്നാമത്തെ ഇന്ത്യൻ ചിത്രമാണിത്. ബാഹുബലി 2: ദ കൺക്ലൂഷൻ, ആമിർ ഖാന്റെ ദംഗൽ എന്നിവയാണ് 1000 കോടി കളക്ഷൻ നേടി മറ്റ് രണ്ട് ചിത്രങ്ങൾ.
ആദ്യ ദിനത്തിൽ ഏറ്റവും അധികം കളക്ഷൻ ഇന്ത്യയിൽ നിന്നും ആഗോള തലത്തിൽ നിന്നും സ്വന്തമാക്കുന്ന ചിത്രം എന്ന റെക്കോർഡും ആർആർആർ സ്വന്തമാക്കിയിരിരുന്നു. മാർച്ച് 25നാണ് ആർആർആർ റിലീസിന് എത്തുന്നത്. സ്വാതന്ത്ര്യത്തിന് മുൻപുള്ള കാലഘട്ടത്തിൽ നടത്തുന്ന ഒരു ഇതിഹാസ യുദ്ധനാടകമാണ് ചിത്രം. കൊമരം ഭീം ആയി ജൂനിയർ എൻടിആറും അല്ലുരി സിതാരാമ രാജുവായി രാം ചരണുമാണ് ചിത്രത്തിൽ എത്തിയത്.
ആർആർആർ റിലീസ് ചെയ്തതുമുതൽ റെക്കോർഡുകൾ ഭേദിച്ച കുതിപ്പിലാണ്. ഇന്റർനാഷണൽ മൂവി ഡാറ്റാ ബേസ് കമ്പനിയുടെ ഏറ്റവും ജനപ്രിയ ചിത്രങ്ങളുടെ ലിസ്റ്റിൽ ആദ്യ അഞ്ച് ചിത്രങ്ങളിലും ആർആർആർ ഇടംപിടിച്ചിട്ടുണ്ട്. ഇതോടെ ആദ്യ അഞ്ചിൽ ഉൾപ്പെടുന്ന ഏക ഇന്ത്യൻ ചിത്രമായിരിക്കുകയാണ് ആർആർആർ.
റിലീസിന് മുൻപ് തന്നെ കോടികളുടെ കലക്ഷൻ ചിത്രം നേടിയിരുന്നു. 450 കോടി ബജറ്റിൽ ഒരുങ്ങിയ ചിത്രം റിലീസിന് മുൻപ് തന്നെ ഡിജിറ്റൽ സാറ്റലൈറ്റ് അവകാശത്തിലൂടെ 325 കോടി സ്വന്തമാക്കിയിരുന്നു. തമിഴ്, തെലുങ്ക്, ഹിന്ദി, കന്നട, മലയാളം എന്നീ ഭാഷകൾക്ക് പുറമെ വിദേശ ഭാഷകളിലും ചിത്രം പുറത്തിറങ്ങി.
Comments