സുരേഷ് ഗോപി നായകനാകുന്ന ഒറ്റക്കൊമ്പന്റെ പുതിയ പോസ്റ്റർ പുറത്തുവിട്ട് സുരേഷ് ഗോപി. ഈസ്റ്റർ ദിനത്തോട് അനുബന്ധിച്ചാണ് പുതിയ പോസ്റ്റർ പുറത്തുവിട്ടിരിക്കുന്നത്. ‘ ഇനി ഉയർത്തെഴുന്നേൽപ്പിന്റെ കാലം’ എന്ന അടിക്കുറിപ്പോടെയാണ് സുരേഷ് ഗോപി പോസ്റ്റർ പങ്കുവെച്ചത്. ‘വീണാലും ഞാൻ ഉയർത്തെഴുന്നേൽക്കും’ എന്ന് ടാഗ് ലൈനോടെ പകുതി മറച്ച രീതിയിൽ സുരേഷ് ഗോപിയുടെ മുഖമാണ് പോസ്റ്ററിൽ കാണാൻ സാധിക്കുന്നത്. സുരേഷ് ഗോപിയുടെ 250-ാമത്തെ ചിത്രമാണ് ഒറ്റക്കൊമ്പൻ.
ചിത്രത്തിൽ പാലാക്കാരൻ അച്ചായനായിട്ടാണ് സുരേഷ് ഗോപി എത്തുന്നത്. മാത്യു തോമസ് പാലമൂട്ടിൽ സംവിധാനം ചെയ്യുന്ന ചിത്രം ഒരു മാസ് എന്റർടൈനെറാണ്. ചിത്രത്തിൽ സുരേഷ് ഗോപിയുടെ കട്ടത്താടിവെച്ചുള്ള കലിപ്പൻ ലുക്ക് നേരത്തെ വൈറലായിരുന്നു. മുകേഷ്, ജോജു ജോർജ്ജ് എന്നിവരും പ്രധാന കഥാപാത്രങ്ങളായി എത്തുന്നുണ്ട്. മുളകുപാടം ഫിലിംസിന്റെ ബാനറിൽ ടോമിച്ചൻ മുളകുപാടമാണ് ചിത്രം നിർമ്മിക്കുന്നത്.
പകർപ്പവകാശം സംബന്ധിച്ച കേസിനെ തുടർന്ന് ഒട്ടേറെ തവണ വാർത്തകളിൽ നിറഞ്ഞ ചിത്രമാണ് ഒറ്റക്കൊമ്പൻ. 25 കോടിയിലേറെ ബജറ്റിലാണ് ചിത്രം ഒരുങ്ങുന്നത്. ഷിബിൻ ഫ്രാൻസാണ് ഒറ്റക്കൊമ്പന്റെ തിരക്കഥ ഒരുക്കുന്നത്. അറ്റാക്ക് ടു ഡിഫൻഡ് എന്ന ടാഗ് ലൈനോടെയാണ് ചിത്രം അണിയറയിൽ ഒരുങ്ങുന്നത്. പുലിമുരുകന് ഛായാഗ്രഹണം നിർവ്വഹിച്ച ഷാജികുമാറാണ് ഒറ്റക്കൊമ്പനും ക്യാമറ ഒരുക്കുന്നത്.
