ഒരിടവേളയ്ക്ക് ശേഷം സുരേഷ് ഗോപിയും സംവിധായകൻ ജോഷിയും ഒന്നിക്കുന്ന ‘പാപ്പൻ’ എന്ന ചിത്രത്തിന്റെ അപ്ഡേറ്റുകൾക്ക് വൻ സ്വീകാര്യതയാണ് ലഭിച്ചുകൊണ്ടിരിക്കുന്നത്. ഇന്നലെ ചിത്രത്തിന്റെ ട്രെയിലർ താരങ്ങളായ മോഹൻലാലും മമ്മൂട്ടിയും ചേർന്ന് പുറത്ത് വിട്ടിരുന്നു. ട്രെയിലർ കണ്ടതോടെ ആരാധകരുടെ ആവേശനം വാനോളം ഉയർന്നിരിക്കുകയാണ്. ഇതൊരു മാസ് പടം തന്നെയായിരിക്കുമെന്നാണ് ആരാധകർ ഒന്നടങ്കം പറയുന്നത്. നിലവിൽ യുട്യൂബ് ട്രെന്റിങ്ങിൽ ഒന്നാമതാണ് പാപ്പൻ ട്രെയിലർ.
പാപ്പൻ ഒരു മർഡർ ഇൻവസ്റ്റിഗേഷൻ ത്രില്ലർ ആയിരിക്കുമെന്നത് ട്രെയിലറിലൂടെ വ്യക്തമാണ്. കേരള പോലീസിലെ ലെഫ്റ്റനന്റ് എബ്രഹാം മാത്യൂ മാത്തൻ എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്. മകൻ ഗോകുലും സുരേഷ് ഗോപിയും ഒന്നിക്കുന്ന ആദ്യ ചിത്രം കൂടിയാണ് പാപ്പൻ. ചിത്രം ബോക്സ് ഓഫീസിൽ പുതു ചരിത്രം കുറിയ്ക്കുമെന്നാണ് ആരാധകരുടെ പ്രതികരണം.
ജോഷി സംവിധാനം ചെയ്യുന്ന ചിത്രത്തിൽ കനിഹ, സണ്ണിവെയിൻ, നൈല ഉഷ തുടങ്ങിയവർ അണിനിരക്കുന്നു. ഡേവിഡ് കാച്ചപ്പിള്ളി പ്രൊഡക്ഷൻസും ക്യൂബ്സ് ഇന്റർനാഷണൽ ഗ്രൂപ്പും ചേർന്നാണ് ചിത്രത്തിന്റെ നിർമ്മാണം. നിഗൂഢതയ്ക്കും സസ്പെൻസിനും വളരെ അധികം പ്രാധാന്യം നൽകുന്ന ചിത്രമാണ് പാപ്പൻ എന്ന് ട്രെയിലറിൽ നിന്നും വ്യക്തമാണ്.
സുരേഷ് ഗോപിയുടെ കരിയറിലെ 252-ാം ചിത്രമായ പാപ്പന്റെ രണ്ടാം ഷെഡ്യൂൾ ഡിസംബർ 13ന് ആരംഭിച്ചിരുന്നു. പിന്നാലെ ജനുവരിയിൽ ചിത്രീകരണവും പൂർത്തിയാക്കി. റേഡിയോ ജോക്കിയും തിരക്കഥാകൃത്തുമായ ആർ ജെ ഷാനിൻറേതാണ് ചിത്രത്തിന്റെ രചന. ഛായാഗ്രഹണം അജയ് ഡേവിഡ് കാച്ചപ്പിള്ളി. എഡിറ്റിംഗ് ശ്യാം ശശിധരൻ. സംഗീതം ജേക്സ് ബിജോയ്.
