മുംബൈ:വാങ്കഡെ സ്റ്റേഡിയത്തിൽ ഈ സീസണിലെ ഏറ്റവും മികച്ച സ്കോർ ഉയർത്തി രാജസ്ഥാൻ റോയൽസ്. ഡൽഹി ക്യാപ്പിറ്റൽസിനെതിരെയാണ് രാജസ്ഥാൻ ബാറ്റർമാർ ഉശിരൻ പ്രകടനം പുറത്തെടുത്തത്.
മൂന്നാം സെഞ്ച്വറി പ്രകടനം നടത്തിയ ജോസ് ബട്ലറും(116) മികച്ച പിന്തുണ നൽകിയ ദേവ്ദത്ത് പടിക്കലും(54) ഡൽഹി ബൗളിംഗിനെ തകർത്തു. സഞ്ജു സാംസണിൻെ(46 നോട്ടൗട്ട്) അതിവേഗ സ്കോറിഗും രാജസ്ഥാന് മികച്ച സ്കോർ സമ്മാനിച്ചു.
ടോസ് നേടിയ ഋഷഭ് പന്ത് നയിക്കുന്ന ഡൽഹി ക്യാപ്പിറ്റൽസ് രാജസ്ഥാനെ ബാറ്റിംഗിനയയ്ക്കുകയായിരുന്നു. ഖലീൽ അഹമ്മദും ശാർദൂൽ ഠാക്കൂറും നയിച്ച ബൗളിംഗ് നിരയ്ക്ക് മേൽ ബട്ലർ കത്തിക്കയറുകയായിരുന്നു. 65 പന്തിലാണ് ബട്ലർ തന്റെ 116 റൺസ് നേടിയത്. 9 സിക്സറും 9 ഫോറുകളും സമന്വയിച്ച ഇന്നിംഗ്സായിരുന്നു ഡൽഹിയെ തകർത്തത്. ഒപ്പം മികച്ച ഫോമിലേക്ക് ഉയർന്ന മലയാളി താരം ദേവ്ദത്ത് പടിക്കൽ 35 പന്തിൽ 54 റൺസ് നേടി. ഓപ്പണിംഗ് കൂട്ടുകെട്ട് 155 റൺസ് എടുത്താണ് പിരിഞ്ഞത്.
പടിക്കലിനെ ഖലീൽ അഹമ്മദ് വിക്കറ്റിന് മുന്നിൽ കുടുക്കുകയായിരുന്നു. എന്നാൽ സഞ്ജു ക്രീസിലെത്തിയതോടെ സ്കോറിംഗിന്റെ വേഗം ബട്ലർ കൂട്ടി. 19 പന്തിൽ 46 റൺസാണ് മികച്ച ഫോമിലുള്ള സഞ്ജു അടിച്ചെടുത്തത്. 3 സിക്സറും 5 ഫോറുകളും നായകന്റെ ബാറ്റിൽ നിന്നും പറന്നു. ബട്ലർ 19-ാം ഓവറിൽ മടങ്ങിയെങ്കിലും അവസാന ഓവറിൽ 20 റൺസാണ് സഞ്ജു അടിച്ചെടുത്ത് ടീമിനെ 222 എന്ന ഉശിരൻ സ്കോറിലേക്ക് എത്തിച്ചത്.
