കോഴിക്കോട്- അട്ടപ്പാടിയിൽ നിന്നുള്ള പട്ടികവർഗ്ഗ വിഭാഗക്കാരിയായ കാൻസർ രോഗി കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശനം ലഭിക്കാതെ രാത്രി മുഴുവൻ ആശുപത്രി വരാന്തയിൽ കഴിച്ചുകൂട്ടിയെന്ന പരാതിയിൽ സംസ്ഥാന മനുഷ്യാവകാശ കമ്മീഷൻ കേസെടുത്തു.
കോഴിക്കോട് പട്ടികവർഗ്ഗ വികസന ഓഫീസർ വിഷയം പരിശോധിച്ച് 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടു. മേയ് 25 ന് കോഴിക്കോട് കളക്ടറേറ്റ് കോൺഫറൻസ് ഹാളിൽ നടക്കുന്ന സിറ്റിംഗിൽ കേസ് പരിഗണിക്കും.
കോട്ടത്തറ കൽക്കണ്ടി ഊരിൽ നിന്നെത്തിയ മല്ലികാരംഗനാണ് (68) ചികിത്സ നിഷേധിച്ചത്. വായിൽ രോഗം ബാധിച്ച വയോധിക തുടർ ചികിത്സക്കു വേണ്ടിയാണ് മെഡിക്കൽ കോളേജ് ആശുപത്രിയിലെത്തിയത്.
കോട്ടത്തറ ട്രൈബൽ ആശുപത്രി ഏർപ്പാട് ചെയ്ത ആമ്പുലൻസിലാണ് ഇവർ മെഡിക്കൽ കോളേജിലെത്തിയത്. രോഗിയെ വിട്ട ശേഷം ഡ്രൈവർ മടങ്ങി. തുടർന്ന് ആശുപത്രി വരാന്തയിൽ ഇവർ കഴിച്ചു കൂട്ടി. പട്ടികവർഗ്ഗ വിഭാഗത്തിലുള്ളവരെ ചികിത്സക്ക് അയക്കുമ്പോൾ ആവശ്യമായ സഹായങ്ങൾ നൽകേണ്ടത് പട്ടികവർഗ്ഗ വകുപ്പിന്റെ ഉത്തരവാദിത്വമാണ്. ഒടുവിൽ പട്ടികവർഗ്ഗ വകുപ്പ് ഇടപെട്ട് വെള്ളിയാഴ്ചയാണ് മല്ലികയും മകനും നാട്ടിലേക്ക് മടങ്ങിയത്.
