ന്യൂഡൽഹി: ഐഎസ്ആർഒയുടെ GSLV-F17 വിക്ഷേപണ വിജയത്തിൽ അഭിനന്ദനവുമായി പ്രധാനമന്ത്രി നരേന്ദ്ര മോദി. EOS-05 ഉപഗ്രഹവുമായി GSLV-F17 വിജയകരമായി വിക്ഷേപിച്ചത് ഇന്ത്യയുടെ ബഹിരാകാശ മേഖലയിലെ മികവിന്റെയും നൂതന ആശയങ്ങളുടെയും വളർച്ചയുടെയും തെളിവാണെന്ന് പ്രധാനമന്ത്രി പറഞ്ഞു.
‘എക്സ്’ പ്ലാറ്റ്ഫോമിലെ കുറിപ്പിലാണ് പ്രധാനമന്ത്രി ഐഎസ്ആർഒയെ അഭിനന്ദിച്ചത്. ഇന്ത്യയുടെ ബഹിരാകാശ പദ്ധതിയിൽ ഐഎസ്ആർഒയും രാജ്യത്തെ വ്യവസായ മേഖലയും തമ്മിലുള്ള സഹകരണം കൂടുതൽ ശക്തമാകുന്നതായും അദ്ദേഹം ചൂണ്ടിക്കാട്ടി.
“ഐഎസ്ആർഒയുടെ മറ്റൊരു മികച്ച നേട്ടം. രാജ്യത്തിന് അഭിമാനിക്കാവുന്ന നിമിഷം. ജിയോസിൻക്രണസ് ഓർബിറ്റിൽ നിന്നുള്ള ഇന്ത്യയുടെ ആദ്യ ഇമേജിങ് ഉപഗ്രഹമായ EOS-05-നെയും വഹിച്ചുള്ള GSLV-F17ന്റെ വിജയകരമായ വിക്ഷേപണം ഇന്ത്യയുടെ ബഹിരാകാശ മേഖലയിലെ മികവിന്റെയും നൂതനത്വത്തിന്റെയും വളരുന്ന ശേഷിയുടെയും പ്രതിഫലനമാണ്,” പ്രധാനമന്ത്രി പറഞ്ഞു.
ഐഎസ്ആർഒയും ഇന്ത്യൻ വ്യവസായ മേഖലയും തമ്മിലുള്ള പങ്കാളിത്തം ബഹിരാകാശ പദ്ധതിക്ക് പുതിയ കരുത്തും വ്യാപ്തിയും നൽകുകയാണെന്നും ഇത് രാജ്യത്തിന്റെ സമ്പൂർണ ബഹിരാകാശ മേഖലയുടെ ശേഷി വർധിപ്പിക്കുകയാണെന്നും പ്രധാനമന്ത്രി കൂട്ടിച്ചേർത്തു.
ആന്ധ്രാപ്രദേശിലെ ശ്രീഹരിക്കോട്ട സതീഷ് ധവാൻ സ്പേസ് സെന്ററിൽ നിന്ന് ഇന്ന് പുലർച്ചെയാണ് EOS-05നെയും വഹിച്ച് GSLV-F17 കുതിച്ചുയർന്നത്. തുടർന്ന് EOS-05 ഉപഗ്രഹത്തെ കൃത്യമായ ഭ്രമണപഥത്തിലേക്ക് എത്തിക്കുകയും ചെയ്തു.
ഏകദേശം 36,000 കിലോമീറ്റർ ഉയരത്തിൽ നിന്ന് രാജ്യത്തിന്റെ വിവിധ ഭാഗങ്ങളുടെ തുടർച്ചയായ ദൃശ്യവിവരങ്ങൾ ലഭ്യമാക്കാൻ EOS-05ന് സാധിക്കും. ഉപഗ്രഹം ചാരപ്രവർത്തനത്തിനുള്ളതല്ലെന്നും രാജ്യത്തിന്റെ സുരക്ഷയ്ക്കും ജനങ്ങളുടെ സുരക്ഷ ഉറപ്പാക്കുന്നതിനുമായി വിവരങ്ങൾ ശേഖരിക്കുകയാണ് ലക്ഷ്യമെന്നും ഐഎസ്ആർഒ ചെയർമാൻ ഡോ. വി. നാരായണൻ വ്യക്തമാക്കി
‘ഇന്ത്യയുടെ ബഹിരാകാശ മുന്നേറ്റത്തിലെ വൻ കുതിപ്പ്’
കേന്ദ്ര ശാസ്ത്ര-സാങ്കേതിക മന്ത്രി ഡോ. ജിതേന്ദ്ര സിങ്ങും ഐഎസ്ആർഒയുടെ നേട്ടത്തെ അഭിനന്ദിച്ചു. GSLV-F17/EOS-05 വിക്ഷേപണം ഇന്ത്യയുടെ ബഹിരാകാശ മേഖലയിലെ വലിയ മുന്നേറ്റമാണെന്ന് അദ്ദേഹം പറഞ്ഞു.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഇന്ത്യയുടെ ബഹിരാകാശ മേഖല തുടർച്ചയായി പുതിയ ഉയരങ്ങൾ കീഴടക്കുകയാണെന്നും ആഗോള ബഹിരാകാശ ശക്തിയെന്ന നിലയിൽ രാജ്യത്തിന്റെ സ്ഥാനം കൂടുതൽ ശക്തമാകുകയാണെന്നും ജിതേന്ദ്ര സിങ് ചൂണ്ടിക്കാട്ടി.
വിസിബിൾ, ഇൻഫ്രാറെഡ്, മൾട്ടി-സ്പെക്ട്രൽ, ഹൈപ്പർസ്പെക്ട്രൽ ബാൻഡുകളിൽ അത്യാധുനിക ചിത്രങ്ങൾ ലഭ്യമാക്കാൻ ശേഷിയുള്ള എർത്ത് ഒബ്സർവേഷൻ ഉപഗ്രഹമാണ് EOS-05 എന്നും അദ്ദേഹം വ്യക്തമാക്കി.
