മുംബൈ: ബിജെപി നേതാവ് കിരിത് സോമയ്യയെ ശിവസേന പ്രവർത്തകർ ആക്രമിച്ച സംഭവത്തിൽ ശക്തമായ നടപടി ആവശ്യപ്പെട്ട് മഹാരാഷ്‌ട്ര മുൻ മുഖ്യമന്ത്രി ദേവേന്ദ്ര ഫഡ്നാവിസ്. മുംബൈയിലും മഹാരാഷ്‌ട്രയിലും സമ്പൂർണ ക്രമസമാധാന തകർച്ചയുണ്ടായെന്നും ഫഡ്നാവിസ് പറഞ്ഞു.
കിരിത് സോമയ്യയെ ഖാർ പോലീസ് സ്റ്റേഷന് മുന്നിലും പോലീസ് ഉദ്യോഗസ്ഥരുടെ സാന്നിധ്യത്തിലും ഗുണ്ടകൾ ആക്രമിച്ചത് അംഗീകരിക്കാനാവില്ല, ശക്തമായ നടപടി വേണമെന്നും ക്രമസമാധാനം തകർന്നുവെന്ന് ഇത് വ്യക്തമാക്കുന്നതായും അദ്ദേഹം പറഞ്ഞു.
പരിക്കേറ്റ സോമയ്യയുടെ വീഡിയോയും ഫഡ്നാവിസ് പങ്കുവച്ചു. ശിവസേന പ്രവർത്തകർ ആക്രമിച്ചതായി പറയുന്ന കാറിനുള്ളിൽ സോമയ്യ ഇരിക്കുന്നതാണ് വീഡിയോയിൽ ഉള്ളത്. അമരാവതി എംപി നവനീത് റാണയെയും ഭർത്താവ് രവി റാണ എംഎൽഎയെയും കാണാൻ സോമയ്യ ഖാർ പോലീസ് സ്റ്റേഷനിൽ പോയതായിരുന്നു.
പോലീസിന്റെ സാന്നിധ്യത്തിൽ ഖാർ പോലീസ് സ്റ്റേഷന് പുറത്ത് ശിവസേന പ്രവർത്തകർ തന്നെ ആക്രമിച്ചതായി സോമയ്യ ആരോപിച്ചു. തനിക്ക് നേരെ കല്ലെറിഞ്ഞ ശിവസേനയുടെ ഒരു കൂട്ടം ഗുണ്ടകളെ പോലീസ് ഖാർ പോലീസ് സ്റ്റേഷന് പുറത്ത് തടിച്ചുകൂടാൻ അനുവദിച്ചു. കല്ലേറിൽ തനിക്ക് പരിക്കേറ്റതായും കാറിന്റെ ചില്ലുകൾ തകർന്നതായും അദ്ദേഹം പറഞ്ഞു. 50 പോലീസ് ഉദ്യോഗസ്ഥരുടെ സാന്നിധ്യത്തിലാണ് തന്നെ ആക്രമിച്ചതെന്നും ബിജെപി നേതാവ് കിരിത് സോമയ്യ ആരോപിച്ചു.
ശനിയാഴ്ച മഹാരാഷ്‌ട്ര മുഖ്യമന്ത്രി ഉദ്ധവ് താക്കറെയുടെ മുംബൈയിലെ വീടിന് പുറത്ത് ഹനുമാൻ ചാലിസ പാരായണം ചെയ്യുമെന്ന് നവനീതും ഭർത്താവും നേരത്തെ പ്രഖ്യാപിച്ചിരുന്നു. എന്നാൽ, ഭരണകക്ഷിയായ ശിവസേനയുടെ കടുത്ത എതിർപ്പിനെ തുടർന്ന് പദ്ധതി ഉപേക്ഷിച്ചു. സംഭവത്തിൽ ദമ്പതികളെ മുംബൈ പോലീസ് ശനിയാഴ്ച അറസ്റ്റ് ചെയ്തിരുന്നു. എംപി നവനീത് റാണയെയും അവരുടെ ഭർത്താവും എംഎൽഎയുമായ രവി റാണയെയും മുംബൈ പോലീസ് അറസ്റ്റ് ചെയ്തത് വേദനാജനകവും മഹാരാഷ്‌ട്രയ്‌ക്ക് നാണക്കേടുണ്ടാക്കുന്നതുമാണെന്നും ഫഡ്നാവിസ് പറഞ്ഞു.
