ദുബായ്: വൈദ്യുത വാഹനങ്ങളെക്കുറിച്ചും ചാർജിങ് സ്റ്റേഷനുകളെക്കുറിച്ചുമുള്ള സമഗ്ര വിവരങ്ങൾ ലഭ്യമാക്കുന്ന വെബ്സൈറ്റ് ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി ആരംഭിച്ചു. വൈദ്യുത വാഹനം വാങ്ങുന്നവർക്ക് വളരെയധികം ഫലപ്രദമാകും ഈ വെബ്സൈറ്റെന്ന് ദീവ അധികൃതർ പറഞ്ഞു. ദുബായിൽ ബസുകളടക്കം കൂടുതൽ വാഹനങ്ങൾ നിരത്തിലിറക്കുന്നതിനൊപ്പം അതിവേഗം ചാർജ് ചെയ്യാൻ കഴിയുന്ന നൂതന സ്റ്റേഷനുകൾ വ്യാപകമാക്കാനാണ് പദ്ധതി. നൂതന സാങ്കേതിക വിദ്യകളുടെ സഹായത്തോടെ വൈദ്യുത വാഹനങ്ങളെ മുൻനിരയിലെത്തിക്കാനുള്ള തയ്യാറെടുപ്പിലാണ് അധികൃതർ.
വൈദ്യുത വാഹനങ്ങൾ പെട്ടെന്ന് ചാർജ് ചെയ്യാൻ കഴിയുന്ന സ്റ്റേഷനുകൾ വ്യാപകമാക്കും. 325ൽ ഏറെ സ്റ്റേഷനുകളിലെ 530ൽ ഏറെ പോയിന്റുകളിൽ രാത്രിയും പകലും ചാർജ് ചെയ്യാം. ഇലക്ട്രിക് ട്രെയിൻ പോലെ മുകളിലെ യൂണിറ്റിൽ നിന്നും കേബിൾ ഉപയോഗിച്ചും ചാർജ് ചെയ്യുന്നതിനു പുറമേ വയലർലെസ് സംവിധാനവുമുണ്ട്. ഷേപ്ഡ് മാഗ്നറ്റിക് ഫീൽഡ് ഇൻ റസൊണൻസ് (എസ്എംഎഫ്ഐആർ) സാങ്കേതികവിദ്യ ഉപയോഗിച്ചാണിത്. ബസുകൾ ഒരു തവണ ചാർജ് ചെയ്താൽ ശരാശരി 200 കിലോമീറ്റർ ഓടും. താപനില, റോഡിന്റെ പ്രത്യേകതകൾ, വാഹനത്തിലെ എയർകണ്ടീഷനുകളുടെ പ്രവർത്തനം എന്നിവയെ ആശ്രയിച്ചാണ് ചാർജിങ് ക്ഷമത ഉണ്ടാകുക.
2008 മുതൽ ദുബായ് റോഡുകളിൽ ഹൈബ്രിഡ് ടാക്സികൾ ഓടുന്നുണ്ട്. സാധാരണ വാഹനങ്ങൾക്ക് 100 കിലോമീറ്റർ ഓടാൻ 12.5 ലിറ്റർ ഇന്ധനം വേണമെങ്കിൽ ഹൈബ്രിഡ് വാഹനങ്ങൾക്ക് 8.25 ലിറ്റർ മതിയാകും.
പരിസ്ഥിതി സൗഹൃദ ഡ്രൈവറില്ലാ വാഹനങ്ങൾ വ്യാപകമാക്കാനുള്ള പഞ്ചവത്സര പദ്ധതിക്ക് കഴിഞ്ഞ ദിവസം ആർടിഎ രൂപം നൽകിയിരുന്നു. 2030 ആകുമ്പോഴേക്കും 4,000 സ്വയം നിയന്ത്രിത ടാക്സികൾ ഉൾപ്പെടെ നഗരപാതകളിലുണ്ടാകും. ദുബായിൽ 2,500ൽ ഏറെ ഇലക്ട്രിക് വാഹനങ്ങളും 6,100ൽ ഏറെ ഹൈബ്രിഡ് വാഹനങ്ങളുമുള്ളതായാണ് കണക്ക്.
Comments