കണ്ണൂർ : കണ്ണൂരിൽ കെ റെയിൽ കല്ലിടലിനെതിരെ പ്രതിഷേധവുമായി ജനങ്ങൾ. എടക്കാട് പോലീസ് സ്‌റ്റേഷൻ പരിസരത്താണ് സംഭവം. ഒരു മുന്നറിയിപ്പും ഇല്ലാതെ കെ റെയിൽ കുറ്റിയടിക്കാൻ എത്തിയ ഉദ്യോഗസ്ഥർക്കെതിരെയാണ് നാട്ടുകാർ തിരിഞ്ഞത്. അടയാളക്കല്ലിടാൻ സാധിക്കാത്ത സ്ഥലങ്ങളിൽ ആണിയടിച്ച് മാർക്ക് ചെയ്യുകയാണ് ഇവർ ചെയ്യുന്നത്. സ്വകാര്യ വ്യക്തികളുടെ സ്ഥലത്ത് കുറ്റിയടിച്ചതിന് പിന്നാലെ നടുറോഡിലും കെ റെയിൽ കല്ലിടാൻ ശ്രമം നടത്തി.
കെ റെയിൽ അടയാളങ്ങൾ രേഖപ്പെടുത്തി ഉദ്യോഗസ്ഥർ കുറ്റയടിക്കാൻ ഇടം കണ്ടെത്തിയത് നടുറോഡിലാണ്. എന്നാൽ ഇവിടെ കല്ലിടാൻ ജനങ്ങൾ സമ്മതിച്ചില്ല. ജനങ്ങളും പോലീസും തമ്മിൽ ഉന്തും തള്ളുമായി. പ്രതിഷേധം കനത്തതോടെ കുറ്റിയടിക്കാതെ ഉദ്യോഗസ്ഥർ പിന്മാറി. റോഡിൽ ആണി അടിച്ച ശേഷമാണ് പോലീസ് ഉൾപ്പെടെ പിന്മാറിയത്. പ്രതിഷേധക്കാരെ ഉദ്യോഗസ്ഥർ ബലം പ്രയോഗിച്ച് നീക്കി.
എന്നാൽ കെ റെയിൽ കല്ലിടലിനെതിരെ മരണം വരെ പോരാടുമെന്നാണ് പ്രതിഷേധക്കാർ പറയുന്നത്. പതിനായിരം പിണറായി വിജയന്മാർ വന്നാലും കുറ്റിയടിക്കാൻ സമ്മതിക്കില്ലെന്നും ഇവർ വ്യക്തമാക്കി. പ്രതിഷേധക്കാരോട് പോലീസ് പിരിഞ്ഞുപോകാൻ ആവശ്യപ്പെട്ടെങ്കിലും നാട്ടുകാർ പിന്മാറാൻ തയ്യാറായിരുന്നില്ല.
