മുംബൈ: ഐപിഎല്ലിൽ കൊൽക്കത്ത നൈറ്റ് റൈഡേഴ്‌സിനെതിരായ മത്സരത്തിൽ ഡൽഹി ക്യാപിറ്റൽസിന് ഉഗ്രൻ ജയം. ആറ് ബോളുകൾ അവശേഷിക്കെ നാല് വിക്കറ്റിനാണ് ഡൽഹി കൊൽക്കത്തയെ മലർത്തിയടിച്ചത്. ഡേവിഡ് വാർണറാണ് ഡൽഹിയുടെ ടോപ്പ് സ്‌കോറർ. കൊൽക്കത്തയുടെ നാല് വിക്കറ്റുകൾ വീഴ്‌ത്തിയ കുൽദീപും ഡൽഹിയ്‌ക്കായി മികച്ച പ്രകടനം കാഴ്ചവെച്ചു.
ടോസ് നഷ്ടപ്പെട്ട് ക്രീസിലിറങ്ങിയ കൊൽക്കത്ത, 20 ഓവറിൽ ഒൻപത് വിക്കറ്റ് നഷ്ടത്തിൽ 146 റൺസെടുത്തു. 34 പന്തിൽ 57 റൺസെടുത്ത നിതീഷ് റാണയും, 37 പന്തിൽ 42 റൺസെടുത്ത ക്യാപ്റ്റൻ ശ്രേയസ് അയ്യരും, 16 പന്തിൽ 23 റൺസെടുത്ത റിങ്കു സിംഗും മാത്രമാണ് കൊൽക്കത്ത നിരയിൽ രണ്ടക്കം കടന്നത്. സുനിൽ നരെയ്ൻ, ആന്ദ്രെ റസ്സൽ, ഉമേഷ് യാദവ്, ടിം സൗത്തി, ഹർഷിത് റാണ എന്നിവർ പൂജ്യത്തിന് പുറത്തായി.
ഓപ്പണറായ ആരോൺ ഫിഞ്ച്(3), വെങ്കടേഷ് അയ്യർ(6), ബാബാ ഇന്ദ്രജിത്ത്(6) എന്നിങ്ങനെയാണ് മറ്റ് താരങ്ങളുടെ സ്‌കോർ. കുൽദീപ് യാദവിന്റെ മികച്ച പ്രകടനത്തിൽ കൊൽക്കത്തയുടെ നാല് വിക്കറ്റുകളാണ് വീണത്. മുസ്തഫിസുർ റഹ്മാൻ മൂന്ന് വിക്കറ്റുകളും, ചേതൻ സക്കറിയ, അക്‌സർ പട്ടേൽ എന്നിവർ ഓരോ വിക്കറ്റ് വീതവും വീഴ്‌ത്തി.
മറുപടി ബാറ്റിംഗിനിറങ്ങിയ ഡൽഹി, 19 ഓവറിൽ ലക്ഷ്യത്തിലെത്തി. ആറ് വിക്കറ്റ് നഷ്ടത്തിൽ 150 റൺസ് നേടിയ ഡൽഹി കൊൽക്കത്തയെ നിഷ്പ്രയാസം വീഴ്‌ത്തുകയായിരുന്നു. 26 പന്തിൽ നിന്നും 42 റൺസ് നേടിയ ഡേവിഡ് വാർണർ, 16 പന്തിൽ നിന്നും 33 റൺസ് നേടി പുറത്താകാതെ നിന്ന റോവ്മാൻ പവൽ എന്നിവർ ഡൽഹി നിരയിൽ തിളങ്ങി. മിച്ചെൽ മാർഷ്(13), ലളിത് യാദവ്(22), അക്‌സർ പട്ടേൽ(24) എന്നിവരാണ് രണ്ടക്കം കടന്ന മറ്റ് താരങ്ങൾ.
പ്രിഥ്വി ഷാ(0), ഋഷഭ് പന്ത്(2), എന്നിവർ മാത്രമാണ് രണ്ടക്കം കടക്കാതിരുന്നത്. കളി ജയിക്കുമ്പോൾ റോവ്മാൻ പവലും ഷർദ്ദുൽ താക്കൂറും(8) ആണ് ക്രീസിലുണ്ടായിരുന്നത്. കൊൽക്കത്തയ്‌ക്കായി ഉമേഷ് യാദവ് ഡൽഹിയുടെ മൂന്ന് വിക്കറ്റുകൾ വീഴത്തി. ഹർഷിത് റാണ, സുനിൽ നരെയ്ൻ എന്നിവർ ഓരോ വിക്കറ്റ് വീതവും വീഴ്‌ത്തി.
ഡൽഹി രണ്ട് മാറ്റവുമായി ക്രീസിലിറങ്ങിയപ്പോൾ, കൊൽക്കത്തയിൽ മൂന്ന് മാറ്റങ്ങളാണുണ്ടായിരുന്നത്. ഡൽഹി ക്യാപിറ്റൽസിനായി ചേതൻ സക്കറിയ അരങ്ങേറുമ്പോൾ മിച്ചെൽ മാർഷ് ടീമിൽ തിരികെയെത്തി. കൊൽക്കത്തയ്‌ക്കായി ബാബ ഇന്ദ്രജിത്തും ഹിമാൻഷു റാണയും ഇന്ന് അരങ്ങേറി. ആരോൺ ഫിഞ്ചും കൊൽക്കത്ത നിരയിൽ തിരികെയെത്തി. സാം ബില്ലിങ്‌സ്, ശിവം മവി, വരുൺ ചക്രവർത്തി എന്നിവർക്ക് പകരമാണ് ഇവർ ടീമിലെത്തിയത്.
