ന്യൂഡൽഹി : ഭരണനിർവ്വഹണം നിയമപരമാണെങ്കിൽ സർക്കാരുകളുടെ പ്രവർത്തനത്തിൽ കോടതിക്ക് ഇടപെടേണ്ടി വരില്ലെന്ന് സുപ്രീം കോടതി ചീഫ് ജസ്റ്റിസ് എൻവി രമണ. സർക്കാർ ജനങ്ങൾക്ക് നീതി ഉറപ്പാക്കിയാൽ കോടതിക്ക് ഇടപേടേണ്ടി വരില്ലെന്ന് അദ്ദേഹം പറഞ്ഞു. ഹൈക്കോടതി ചീഫ് ജസ്റ്റിസുമാരുടെയും മുഖ്യമന്ത്രിമാരുടെയും യോഗത്തിലാണ് ചീഫ് ജസ്റ്റിസിന്റെ വിമർശനം.
സർക്കാർ സംവിധാനങ്ങൾ കൃത്യമായി പ്രവർത്തിച്ചാൽ പൊതുജനങ്ങൾ കോടതികളെ സമീപിക്കുന്നത് നിർത്തും. പൊതുതാത്പര്യ ഹർജികൾ കോടതിയുടെ ജോലി ഭാരമാണ് വർദ്ധിപ്പിക്കുന്നത്. പോലീസിന്റെ പ്രവൃത്തികളെയും ചീഫ് ജസ്റ്റിസ് രൂക്ഷമായി വിമർശിച്ചു. പോലീസ് അന്യായമായ അറസ്റ്റും പീഡനവും നിർത്തണമെന്നും ജനങ്ങളോട് നല്ല രീതിയിൽ പെരുമാറണമെന്നും അദ്ദേഹം പറഞ്ഞു. കോടതി ഉത്തരവുകൾ നടപ്പിലാക്കുന്നതിൽ സർക്കാരുകൾ വർഷങ്ങളോളം കാലതാമസം വരുത്തുന്നുണ്ട്. ഇത് നല്ല പ്രവണത അല്ലെന്നും എൻവി രമണ ചൂണ്ടിക്കാട്ടി.
കോടതിയിൽ നടക്കുന്ന കാര്യങ്ങളെക്കുറിച്ചും അവരുടെ കേസുകളിലെ വിവരങ്ങളെക്കുറിച്ചും ആളുകൾ അറിഞ്ഞിരിക്കേണ്ടത് അനിവാര്യമാണ്. അത് കല്യാണത്തിന് മന്ത്രം ജപിക്കുന്നത് പോലെ പറയേണ്ട ഒന്നല്ല. പലർക്കും എന്താണ് നടക്കുന്നത് എന്ന് പോലും അറിയില്ല. അതിനാൽ ഹൈക്കോടതികളിൽ പ്രാദേശിക ഭാഷ ഉപയോഗിക്കാനുള്ള അനുമതി നൽകണമെന്നും എൻവി രമണ പറഞ്ഞു.
