ലണ്ടൻ: ബ്രിട്ടണിലെ ഭരണകക്ഷിയായ കൺസർവേറ്റീവ് പാർട്ടി എംപി നീൽ പാരിഷ് രാജിവെച്ചു. ചേംബറിലിരുന്ന് അശ്ലീല വീഡിയോ കണ്ടുവെന്ന വനിതാ എംപിമാരുടെ പരാതിയെ തുടർന്നാണ് രാജി. എംപിയെ പാർട്ടി അന്വേഷണ വിധേയമായി സസ്പെൻഡ് ചെയ്തിരുന്നു. പിന്നാലെയാണ് കുറ്റസമ്മതം നടത്തിയ എംപി രാജിവെച്ചത്. ഹൗസ് ഓഫ് കോമൺസ് ചേംബറിൽ ഇരുന്ന് 65കാരനായ നീൽ പാരിഷ് മൊബൈൽ ഫോണിൽ അശ്ലീല വീഡിയോ കാണുകയായിരുന്നു.
താൻ ഏത് അന്വേഷണവുമായും സഹകരിക്കുമെന്നും രാജിവെച്ചാലും എംപിയെന്ന നിലയിൽ തന്റെ ചുമതലകൾ തുടരുമെന്നുമാണ് നീൽ പാരിഷ് പറഞ്ഞത്. എംപിയ്ക്കെതിരെ പാർട്ടി അന്വേഷണം നടത്തുകയാണ്. അന്വേഷണ റിപ്പോർട്ട് ലഭിക്കും വരെയാണ് അദ്ദേഹത്തെ താത്കാലികമായി സസ്പെൻഡ് ചെയ്തത്. പ്രതിപക്ഷ ലേബർപാർട്ടിയിൽ നിന്നുള്ള വനിതാ എംപിമാർ നീലിനെതിരെ ശക്തമായി രംഗത്തെത്തിയിരുന്നു.
പാർലമെന്റ് സമ്മേളനത്തിനിടെ നീലിന് അടുത്തിരുന്ന രണ്ട് വനിതാ സഹപ്രവർത്തകരാണ് ആരോപണവുമായി എത്തിയത്. ഇദ്ദേഹത്തിന് സമീപത്തിരുന്നപ്പോൾ അശ്ലീല വീഡിയോകൾ ഫോണിൽ കാണുകയായിരുന്നുവെന്നാണ് ആരോപണം. പാർലമെന്ററി സ്റ്റാൻഡിംഗ് കമ്മീഷ്ണർ കാതറിൻ സ്റ്റോണാണ് സംഭവത്തിൽ അന്വേഷണം നടത്തുന്നത്. സംഭവത്തിൽ നീൽ കുറ്റക്കാരനാണെന്ന് തെളിഞ്ഞാൻ അദ്ദേഹത്തിനെതിരെ കടുത്ത നടപടികൾ സ്വീകരിച്ചേക്കും.
Comments