ജനിച്ചത് 1832 ൽ, വയസ്സ് 190, രണ്ട് ലോക മഹായുദ്ധങ്ങൾക്കും സാക്ഷിയാണ്. ഇതേതാ ഇങ്ങനെ ഒരു കക്ഷി എന്നല്ലേ ചിന്തിക്കുന്നത്. എന്തായാലും ചിന്തിച്ച് തല പുണ്ണാക്കേണ്ട, ജൊനാഥൻ എന്ന് പേരുള്ള ഒരു ആമയെക്കുറിച്ചാണ് പറഞ്ഞുവരുന്നത്. ജീവിച്ചിരിക്കുന്നതിൽ ഏറ്റവും പ്രായമുള്ള ജീവി എന്ന നിലയിൽ ഗിന്നസ് റെക്കോർഡിൽ ഇടം പിടിച്ച ആമ.
ആമകളും ടെറാപ്പിനുകളും അടങ്ങുന്ന ചെലോണിയൻ വിഭാഗത്തിലെ ഏറ്റവും പ്രായം ജീവിയാണ് ജോനാഥൻ. ഗിന്നസ് വേൾഡ് റെക്കോർഡ്‌സ് റിപ്പോർട്ട് അനുസരിച്ച്, ജോനാഥൻ 1832-ൽ ജനിച്ചതായാണ് വിശ്വസിച്ചു പോരുന്നത്. അങ്ങനെയങ്കിൽ ഈ വർഷം ജോനാഥന് 190 വയസ്സായി. ജൊനാഥൻ ജനിച്ച സമയത്ത് ഉണ്ടായിരുന്നവരാരും ഇപ്പോൽ ജീവിച്ചിരിപ്പില്ലാത്തത് കാരണം ഏകദേശ കണക്കുകൾ മാത്രമാണ് ഉള്ളത്. 1882 ൽ സീഷെൽസിൽ നിന്ന് ബ്രിട്ടീഷ് അധീന പ്രദേമായ സെന്റ് ഹെലീന ദ്വീപിൽ എത്തിച്ചേരുമ്പോൾ ജൊനാഥൻ പൂർണവളർച്ച പ്രാപിച്ച് തന്റെ അമ്പതുകളിൽ ആയിരുന്നു. ഇത് വെച്ചാണ് ആമയുടെ വളർച്ച കണക്കാക്കിയത്.
190 പിന്നിടുമ്പോൾ ജൊനാഥന് കാഴ്ചശക്തിയോ ഘ്രാണശക്തിയോ ഒന്നും തന്നെയില്ല. അതുകൊണ്ട് തന്നെ വെറ്ററിനറി ജീവനക്കാരാണ് ആമയെ പരിപാലിക്കുന്നത്. കൃത്യമായ ഇടവേളകളിൽ ഇവർ ഭക്ഷണം നൽകും. കാബേജ്, കുക്കുംബർ, കാരറ്റ്, ആപ്പിൾ, ബനാന എന്നിവയെല്ലാമാണ് ജോനാതന്റെ ഇഷ്ടഭക്ഷണം.
ഈ ആഹാരത്തിൽ ജോനാതന്റെ നിലനിൽപ്പിന് ആവശ്യമായ കലോറികൾ, വൈറ്റമിനുകൾ, മിനറലുകൾ എന്നിവയെല്ലാം ഉൾപ്പെടുത്തിയിരിക്കും. പക്ഷേ ആഴ്ചയിലൊരിക്കലേ കഴിക്കു.
പ്രായമായേങ്കിലും ജൊനാഥന്റെ കേൾവി ശക്തിക്ക് കേടുപാടുകൾ സംഭവിച്ചിട്ടില്ല. അതുകൊണ്ട് തന്നെ മനുഷ്യരുമായി ഇടപെടുന്നത് ജോനാഥന് ഇഷ്ടമാണ്. ജോ ഹോളിൻ എന്ന വെറ്ററിനേറിയനാണ് ജോനാതന്റെ പ്രിയ ചങ്ങാതി. ജോനാഥൻ തന്റെ ജീവിതത്തിന്റെ ഭൂരിഭാഗവും സെന്റ് ഹെലീനയിലെ ഗവർണറുടെ വസതിയിലാണ് ചെലവഴിച്ചത്. ഡേവിഡ്, എമ്മ, ഫ്രെഡ് എന്നീ പേരുകളുള്ള മറ്റു മൂന്ന് ആമകളും ജോനാഥന് കൂട്ടായി ഇവിടെയുണ്ട്.
ജോനാഥൻ ഗിന്നസിൽ ഇടംനേടുന്നതിന് മുമ്പ് ആ നേട്ടം കൈവരിച്ചത് തുയി മലില എന്ന ആമയായിരുന്നു. 1777 ൽ ടോങ്കയിലെ രാജകുടുംബത്തിന് ക്യാപ്റ്റൻ കുക്ക് സമ്മാനിച്ചതായിരുന്നു മലിലയെ. 188 വയസുവരെ ജീവിച്ച മലില 1965 ലാണ് മരണമടയുന്നത്.
