മോഹൻലാൽ-ജീത്തു ജോസഫ് കൂട്ടുകെട്ടിലെത്തുന്ന ചിത്രം 12ത് മാനിന്റെ ട്രെയ്‌ലർ പുറത്ത്. ചിത്രത്തിന്റെ റിലീസ് ഡേറ്റും പ്രഖ്യാപിച്ചിട്ടുണ്ട്. ഹോട്ട്‌സ്റ്റാറിലൂടെ ചിത്രം മെയ് 20ന് റിലീസിനെത്തും. ഏറെ നിഗൂഢത ഒളിപ്പിച്ചു കൊണ്ടാണ് ചിത്രത്തിന്റെ ട്രെയ്‌ലർ എത്തിയിരിക്കുന്നത്. ദൃശ്യം രണ്ടാം ഭാഗത്തിന് ശേഷം മോഹൻ ലാലും ജീത്തു ജോസഫും ഒന്നിക്കുന്ന ചിത്രമാണിത്.
കെ.ആർ. കൃഷ്ണ കുമാർ ആണ് തിരക്കഥ. 24 മണിക്കൂറുകൾക്കുള്ളിൽ നടക്കുന്ന കഥയാണ് ചിത്രം പറയുന്നത്. ഒരൊറ്റ ലൊക്കേഷനിലാണ് ചിത്രം മുഴുവൻ ഷൂട്ട് ചെയ്തിരിക്കുന്നത്. 11 കൂട്ടുകാരുടെ ഒരു ഗെറ്റ് – ടുഗെദർ വേളയിൽ പന്ത്രണ്ടാമനായി എത്തുന്ന മോഹൻലാലിന്റെ കഥാപാത്രവും തുടർന്നുണ്ടാകുന്ന സംഭവങ്ങളുമാണ് ചിത്രത്തിന്റെ പ്രമേയം.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ചിത്രം നിർമിക്കുന്നത്. അനുശ്രീ, അദിതി രവി, ഷൈൻ ടോം ചാക്കോ, സൈജു കുറുപ്പ്, ശിവദ നായർ തുടങ്ങി ഒട്ടേറെ താരങ്ങൾ 12ത് മാനിൽ അഭിനയിക്കുന്നുണ്ട്. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിർവഹിക്കുന്നത്. രാജീവ് കോവിലകമാണ് ചിത്രത്തിന്റെ കലാസംവിധായകൻ.
