ഒറ്റനോട്ടത്തിൽ വളരെ കൗതുകവും അൽപ്പം ഭയവും തോന്നുന്ന ഈ ഗർത്തത്തിന്റെ പേര് ഗ്ലോറി ഹോൾ എന്നാണ്. കാലിഫോർണിയയുടെ വടക്ക് സ്ഥിതിചെയ്യുന്ന നാപ്പ താഴ്‌വരയിലാണ് ഇതുള്ളത്. കൗതുകമേറെയുള്ള ഗർത്തമായതുകൊണ്ട് തന്നെ ലക്ഷക്കണക്കിന് വിനോദ സഞ്ചാരികളാണ് ഇത് കാണാനെത്തുക.
പെട്ടെന്നൊരു സുപ്രഭാതത്തിൽ പൊട്ടിമുളച്ച ഗർത്തമല്ലിത്. മറിച്ച് 1950-കളിൽ എഞ്ചിനീയർമാരുടെ കരവിരുതിൽ നിർമിക്കപ്പെട്ട സ്പിൽവേ ആണിത്. നാപ്പ താഴ്‌വരയിലെ മോണ്ടിസെല്ലോ അണക്കെട്ടിന് സമീപമാണ് ഈ ഗർത്തം സ്ഥിതിചെയ്യുന്നത്. ബെരിസ എന്ന തടാകത്തിനോട് ചേർന്ന് കിടക്കുന്ന മോണ്ടിസെല്ലോ ഡാമിന് ഏകദേശം 90 മീറ്ററിലധികം ഉയരമുണ്ടെന്ന് പറയപ്പെടുന്നു. ഈ അണക്കെട്ടില്ലാണ് അതിമനോഹരമായ കാഴ്ച നൽകുന്ന ഗ്ലോറി ഹോൾ സ്ഥിതിചെയ്യുന്നത്..
ഗ്ലോറി സ്പിൽവേ എന്നും വിളിക്കപ്പെടുന്ന ഈ ഗർത്തത്തിന്റെ വ്യാസം 72 അടിയാണ്. ഗർത്തത്തിന് 245 അടി ആഴമുണ്ടെന്നും കണക്കാക്കുന്നു. എന്തിനാണ് അണക്കെട്ടിൽ ഈ ഗർത്തം നിർമിച്ചതെന്ന് ചോദിച്ചാൽ, അണക്കെട്ടിൽ വെള്ളം നിറയുന്ന ഘട്ടങ്ങളിൽ കൂടുതലായുള്ള വെള്ളത്തെ വലിച്ചെടുക്കുന്നതിന് വേണ്ടിയാണ് ഗർത്തം നിർമിച്ചിട്ടുള്ളത്. സെക്കൻഡിൽ 48,800 ഘനയടി വെള്ളം ഈ ഗർത്തത്തിലൂടെ കടന്നുപോകും.
വെള്ളത്തെ ഗർത്തം വലിച്ചെടുക്കുമെന്നതുകൊണ്ട് തന്നെ ഇവിടെ നീന്താൻ ഇറങ്ങുന്നതും സുരക്ഷിതമല്ല. ഇത്തരത്തിൽ ഗർത്തത്തിനുള്ളിലേക്ക് പോയ ആളുകളെ പിന്നീട് രക്ഷിക്കാനുമായിട്ടില്ല. 1997ൽ ഒരു വിദ്യാർത്ഥിനി ഇത്തരത്തിൽ കൊല്ലപ്പെട്ടിരുന്നു. അതുകൊണ്ട് കർശന നിയന്ത്രണങ്ങളോടെയാണ് സഞ്ചാരികളെ ഈ കാഴ്ച കാണാൻ അനുവദിക്കുക.
വർഷങ്ങൾക്ക് മുമ്പ് കൃഷിയാവശ്യങ്ങൾക്കായിട്ടായിരുന്നു ഗർത്തം നിലനിൽക്കുന്ന ഈ ഡാം നിർമ്മിക്കപ്പെട്ടത്. സമീപത്തെ സൊളാനോ, യൊലേ താഴ്‌വരകളിലേക്കുള്ള 96,000 ഏക്കർ വരുന്ന കൃഷിയിടത്തിലേക്കുള്ള ജലസേചനം ഈ അണക്കെട്ട് മുഖേനയാണ് നടത്തുന്നത്.
ഗർത്തത്തിലൂടെ വെള്ളമൊഴുകുന്ന ആ കാഴ്ച എല്ലാ വർഷവും ഉണ്ടാകണമെന്നില്ല. ഒടുവിലായി 2019 ഫെബ്രുവരിയിലായിരുന്നു അത് സംഭവിച്ചത്. നല്ല മഴക്കാലത്ത് അണക്കെട്ട് നിറയുമ്പോഴാണ് നയനമനോഹരമായ ഈ കാഴ്ചയുണ്ടാകുക.
