ന്യൂഡൽഹി: 65 മണിക്കൂർ നീണ്ടുനിൽക്കുന്ന യാത്ര.. 50 വ്യവസായ പ്രമുഖരുമായി ചർച്ച.. തിരക്കേറിയ ഷെഡ്യൂളുകളുമായി പ്രധാനമന്ത്രി നരേന്ദ്രമോദി നടത്തിയ യൂറോപ്പ് സന്ദർശനം ഇന്ന് അവസാനിച്ചിരിക്കുകയാണ്. ഒടുവിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായി ചർച്ച നടത്തി അദ്ദേഹം പാരീസിൽ നിന്ന് ഇന്ത്യയിലേക്ക് യാത്ര തിരിച്ചു. യൂറോപ്പ് പര്യടനത്തിനിടെ ജർമ്മനിയും സന്ദർശിച്ചാണ് മോദിയുടെ തിരിച്ചുവരവ്. അതിനിടെയാണ് അദ്ദേഹത്തിന്റെ ഒരു പഴയ കാല ഫോട്ടോ വൈറലാകുന്നത്.
1993ൽ അമേരിക്കയിൽ നിന്നും മടങ്ങി വരികയായിരുന്ന നരേന്ദ്രമോദി ജർമനിയിലെ ഫ്രാങ്ക്ഫട്ട് സന്ദർശിച്ചിരുന്നു. അവിടെ വെച്ച് പകർത്തിയ ചിത്രം 30 വർഷങ്ങൾക്കിപ്പുറം സോഷ്യൽ മീഡിയ ഏറ്റെടുത്തു. വെള്ള ഷർട്ടും നീല ജാക്കറ്റും ധരിച്ച് നിൽക്കുന്ന ചെറുപ്പക്കാരനായ മോദിയുടെ ചിത്രത്തെ ഏറെ കൗതുകത്തോടെയാണ് സമൂഹമാദ്ധ്യമം ഏറ്റെടുത്തത്. മൂന്ന് ദശാബ്ദങ്ങൾ പിന്നിടുമ്പോൾ ഏറ്റവും ഒടുവിൽ മെയ് രണ്ടിനായിരുന്നു മോദി ജർമ്മനിയിലെത്തിയത്. അവിടെ ജർമ്മൻ ചാൻസിലർ ഒലാഫ് സ്‌കോൾസുമായി അദ്ദേഹം കൂടിക്കാഴ്ച നടത്തുകയും ചെയ്തു.
ജർമ്മനി, ഡെൻമാർക്ക്, ഫ്രാൻസ് എന്നീ രാജ്യങ്ങളാണ് യൂറോപ് പര്യടനത്തിൽ മോദി സന്ദർശിച്ചത്. പര്യടനത്തിനിടെ ഏഴ് രാജ്യങ്ങളിൽ നിന്നുള്ള എട്ട് ലോക നേതാക്കളുമായി അദ്ദേഹം ഉഭയകക്ഷി കൂടിക്കാഴ്ചകൾ നടത്തി. മൂന്ന് രാജ്യങ്ങളിലെയും ആയിരക്കണക്കിന് വരുന്ന ഇന്ത്യൻ സമൂഹത്തിനോടും അദ്ദേഹം സംവദിച്ചു.
