ജിമ്മിൽ പോയി സമയം കളയാൻ വയ്യ.. സിക്സ്പാക്ക് വേണംതാനും.. അപ്പോൾ എന്താണുവഴി.. മാർഗമുണ്ടെന്നാണ് ഒരു ടാറ്റൂ ആർട്ടിസ്റ്റായ ടിക്ക്ടോക്ക് കലാകാരൻ പറയുന്നത്.
ജിമ്മിൽ പോയി കഷ്ടപ്പെടാനും സമയം കളയാനും മനസില്ലാത്തവർക്ക് വേണ്ടിയാണ് ഡീൻ ഗന്തർ എന്ന ടാറ്റൂ കലാകാരൻ പുതിയ വഴി കണ്ടെത്തിയിരിക്കുന്നത്. സിക്സ്പാക്ക് കിട്ടാൻ വയറിൽ ടാറ്റൂ കുത്തിയാൽ മതി. കുടവയറിൽ ‘സിക്സ്പാക്ക് ടാറ്റൂ’ അടിച്ചാൽ ഒറിജിനൽ സിക്സ്പാക്ക് പോലും മാറിനിൽക്കുമെന്ന് ഡീൻ പറയുന്നു.
”എങ്ങനെ രണ്ട് ദിവസത്തിനുള്ളിൽ സിക്സ്പാക്ക് ഉണ്ടാക്കാം.. ടാറ്റൂ ചെയ്താൽ മതി.. തന്റെ കസ്റ്റമേഴ്സിൽ ഒരാൾക്ക് താനിത് ചെയ്തു നൽകി. അയാൾ നാളുകളായി ജിമ്മിൽ പോയി കഷ്ടപ്പെടുകയായിരുന്നു. എന്നിട്ട് ഒരു പാക്കും അദ്ദേഹത്തിന് കിട്ടിയില്ല. ഫലം കിട്ടാതായപ്പോഴാണ് അയാൾ തന്നെ സമീപിച്ചത്. താൻ അയാൾക്ക് മനോഹരമായ സിക്സ് പാക്ക് ടാറ്റൂ ചെയ്ത് നൽകി” ഡീൻ ഗന്തർ പറഞ്ഞു.
ഒരു ടിക്ക്ടോക്ക് വീഡിയോയിലൂടെയാണ് ഡീൻ ഗന്തർ ഇക്കാര്യം അറിയിച്ചത്. സൗത്ത് ആഫ്രിക്കൻ സ്വദേശിയായ ഗന്തർ മാഞ്ചസ്റ്ററിലാണ് താമസിക്കുന്നത്. തന്റെ പുതിയ പരീക്ഷണമായ സിക്സ് പാക്ക് ടാറ്റൂവിന് അദ്ദേഹം ഫീസ് ഈടാക്കിയിട്ടില്ലെന്നും അവകാശപ്പെട്ടു.
Comments