സമസ്തയുടെ വേദിയിൽ അപമാനിതയായ വിദ്യാർഥിനിയെ പിന്തുണച്ചും മാപ്പ് അപേക്ഷിച്ചും മുൻമന്ത്രി മാത്യു ടി തോമസ് രംഗത്ത്. ആദ്യമായാണ് ഒരു ഇടതുപക്ഷ നേതാവ് ഈ വിഷയത്തിൽ പരസ്യ പ്രതികരണവുമായി രംഗത്ത് വരുന്നത്. ഫെയ്ബുക്ക് പോസ്റ്റിലൂടെയാണ് അദ്ദേഹം ഇക്കാര്യത്തിൽ തന്റെ നിലപാട് വ്യക്തമാക്കിയത്.
കഷ്ടം എന്ന് പറഞ്ഞാണ് അദ്ദേഹത്തിന്റെ കുറിപ്പ് തുടങ്ങുന്നത്. പഠനമികവിന് സമ്മാനിതയായത് 16 വയസ്സുകാരി പെൺകുട്ടിയായിപ്പോയത് കൊണ്ട് ഇത്ര മ്ലേച്ഛത്തരം പാടുണ്ടോ? അദ്ദേഹം ചോദിക്കുന്നു. ലിംഗസമത്വം, തുല്യനീതി, ഭരണഘടനാതത്വങ്ങൾ അവിടെ നിൽക്കട്ടെ.. ആ കുഞ്ഞു മനസ്സിനെ വേദനിപ്പിച്ചില്ലേ? ആ അപരാധത്തിന് മതത്തിന്റെ സംരക്ഷണമോ? മതബോധനങ്ങളുടെ ദുർവ്യാഖ്യാനം എന്ന് കരുതിക്കോട്ടെ? മകളേ പൊറുക്കൂ ഞങ്ങളോട്. ഇന്ന് നിനക്കീ വേദന സമ്മാനിച്ച ഞങ്ങൾ നിന്നെ നമിക്കുന്ന ഒരു ദിനമുണ്ടാവും.. തീർച്ച എന്ന് പറഞ്ഞാണ് കുറിപ്പ് അവസാനിപ്പിച്ചിരിക്കുന്നത്.
മതപൗരോഹിത്യത്തിനെതിരെ വിമർശിച്ച മാത്യു ടി തോമസിന്റെ ഫെയ്‌സ്ബുക്ക് പോസ്റ്റിനെതിരെ പതിവു പോലെ മതമൗലികവാദികൾ വലിയ അധിക്ഷേപങ്ങളാണ് ചൊരിയുന്നത്. ഇസ്ലാമിനെ ചൊറിയാൻ വരേണ്ടെന്നും മതത്തിന്റെ കാര്യങ്ങൾ നോക്കാൻ മതപണ്ഡിതന്മാരുണ്ടെന്നും ഇവർ വ്യക്തമാക്കുന്നു. മുസ്ലിങ്ങളെ ബാധിക്കുന്ന പ്രശ്‌നങ്ങളിൽ മാത്യു ടി തോമസ് പ്രതികരിച്ചില്ലെന്നാണ് ഒരു വിഭാഗം പറയുന്നത്. കിണറ്റിൽ വീണ് ജീവൻ നഷ്ടമായ കന്യാസ്ത്രീകളുടെ കാര്യത്തിൽ പോസ്റ്റ ചെയ്യാത്തതെന്തെന്ന് മറു വിഭാഗം വിമർശനം ഉന്നയിക്കുന്നു.
മാത്യു ടി തോമസിന്റെ ഫെയ്‌സ്ബുക്ക് പോസ്റ്റ് താഴെ
കഷ്ടം !
സമ്മാനം സ്വീകരിക്കുന്നതിനു വേദിയിലേക്ക് പെൺകുട്ടിയെ ക്ഷണിച്ചതിന് സംഘാടകർക്കു മേൽ മതനിഷ്ഠകളുടെ മറവിൽ ശകാരങ്ങൾ വർഷിക്കുന്ന ദൃശ്യങ്ങൾ ഇന്നത്തെ വാർത്തകളിൽ കാണാനിടയായി.
പഠനമികവിന് സമ്മാനിതയായത് 16 വയസ്സുകാരി പെൺകുട്ടിയായിപ്പോയത് കൊണ്ട് ഇത്ര മ്ലേച്ഛത്തരം പാടുണ്ടോ?
ലിംഗസമത്വം, തുല്യനീതി,…
ഭരണഘടനാതത്വങ്ങൾ അവിടെ നിൽക്കട്ടെ..
ആ കുഞ്ഞു മനസ്സിനെ വേദനിപ്പിച്ചില്ലേ?
ആ അപരാധത്തിന് മതത്തിന്റെ സംരക്ഷണമോ?
മതബോധനങ്ങളുടെ ദുർവ്യാഖ്യാനം എന്ന് കരുതിക്കോട്ടെ?
മകളെ… പൊറുക്കു ഞങ്ങളോട്.
മറക്കു ഇന്നെന്ന കറുത്ത ദിനത്തെ.
വെല്ലുവിളിയായി ഈ അനുഭവം മാറട്ടെ.
നീ മിടുക്കിയായി വളരണം.
ഒന്നും നിന്നെ തളർത്താതിരിക്കട്ടെ.
നീ നിന്ദിതയല്ല…ആവരുത്..
ഇന്ന് നിനക്കീ വേദന സമ്മാനിച്ച ഞങ്ങൾ നിന്നെ നമിക്കുന്ന ഒരു ദിനമുണ്ടാവും.. തീർച്ച.
മാത്യു ടി. തോമസ്
