കണവ അഥവാ കൂന്തൾ എന്നറിയപ്പെടുന്ന മത്സ്യം മലയാളികൾക്ക് ഏറെ പ്രിയപ്പെട്ടതാണ്. ആഗോളതലത്തിൽ സ്ക്വിഡ് എന്ന് വിളിക്കുന്ന കൂന്തളിന് ലോകത്തിന്റെ വിവിധയിടങ്ങളിൽ ആരാധകരുണ്ട്. ഒമ്പതടിയോളം നീളം വരുന്ന ഭീമൻ കണവയെ പിടികൂടിയതും കഴിഞ്ഞ ദിവസം വാർത്തകളിൽ ഇടംപിടിച്ചിരുന്നു.
ഇത്രയേറെ ആരാധകരുള്ള കൂന്തളിന്റെ ഒരു വീഡിയോ ഇപ്പോൾ സമൂഹമാദ്ധ്യമങ്ങളിൽ വൈറലാണ്. ദൃശ്യങ്ങളിൽ കാണിക്കുന്നത് ‘ട്രാൻസ്പെരന്റ്’ കണവയാണെന്നതാണ് പ്രത്യേകത. അതായത് കൂന്തളിന്റെ ഇപ്പുറത്ത് നിന്ന് നോക്കിയാൽ അപ്പുറം കാണാം. ചില്ല് രൂപത്തിലുള്ള കൂന്തളായതിനാൽ ഇതിന് ഗ്ലാസ് സ്ക്വിഡ് എന്നാണ് പേരിട്ടിരിക്കുന്നത്.
Glass squid that changes color instantly.
pic.twitter.com/SCyRirE9cG— Figen (@TheFigen) May 14, 2022
വെറും ഏഴ് സെക്കൻഡ് മാത്രം ദൈർഘ്യമുള്ള ട്വിറ്റർ വീഡിയോയിലാണ് ഗ്ലാസ് സ്ക്വിഡിനെ പരിചയപ്പെടുത്തുന്നത്. എന്നാൽ ഈ കൂന്തൾ ട്രാൻസ്പെരന്റ് ആകുന്നത് വെള്ളത്തിൽ നിന്ന് പുറത്തെടുക്കുമ്പോൾ മാത്രമാണെന്നതാണ് പ്രത്യേകത. വെള്ളത്തിലിടുമ്പോൾ കറുപ്പ് നിറമുള്ള കൂന്തളിനെ ഒരാൾ കയ്യിലെടുത്ത് കാണിക്കുമ്പോഴാണ് നിറമില്ലാതായി മാറുന്നത്. തിരികെ വീണ്ടും വെള്ളത്തിലിടുമ്പോൾ കൂന്തളിന് കറുപ്പ് നിറമാകുന്നു.
പൊടുന്നനെ നിറം മാറുന്ന ഈ കൂന്തളിനെ പരിചയപ്പെടുത്തുന്ന വീഡിയോ വളരെ പെട്ടെന്നാണ് ട്വിറ്ററിൽ തരംഗമായത്. അഞ്ചരലക്ഷത്തോളം പേർ കണ്ടുകഴിഞ്ഞ വീഡിയോ ദൃശ്യങ്ങൾ പലർക്കും അവിശ്വസനീയമായി തോന്നി. നിറം മാറുന്ന പലതരത്തിലുള്ള കൂന്തളുകൾ ഉണ്ടെന്നാണ് ശാസ്ത്രലോകം പറയുന്നത്. മില്ലിസെക്കൻഡ് നേരം കൊണ്ട് നിറം മാറാൻ കഴിയുന്നവയെയും കണ്ടെത്തിയിട്ടുണ്ട്.
Comments