അഹമ്മദാബാദ് : ഗുജറാത്തിൽ ഫാക്ടറിയുടെ മതിൽ ഇടിഞ്ഞ് വീണ് അപകടം. 1ദുരന്തത്തിൽ 12 തൊഴിലാളികൾ മരിച്ചു. മോർബി ജില്ലയിലാണ് ദുരന്തമുണ്ടായത്. ഗുജറാത്ത് ഇൻഡസ്ട്രിയൽ ഡെവലെപ്പ്‌മെന്റ് കോർപ്പറേഷന്റെ(ജിഐഡിസി) ഉപ്പ് ഫാക്ടറിയിലാണ് അപകടമുണ്ടായത്.നിരവധി പേർ മതിലിന്റെ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നുണ്ടെന്നാണ് വിവരം. തൊഴിലാളികൾ ഉപ്പ് നിറയ്‌ക്കുന്നതിനിടെയാണ് അപകടമുണ്ടായത്.
പ്രധാനമന്ത്രി നരേന്ദ്രമോദി അനുശോചനം രേഖപ്പെടുത്തി. മോർബിയിൽ മതിൽ ഇടിഞ്ഞു വീണുണ്ടായ അപകടം ഹൃദയഭേദകമാണ്. വിഷമം നിറഞ്ഞ ഈ മണിക്കൂറിൽ ദുഃഖിതരായ കുടുംബാംഗങ്ങളെ ഓർക്കുന്നു. പരിക്കേറ്റവർക്ക് ഉടൻ സുഖംപ്രാപിക്കാൻ കഴിയട്ടെ. പ്രാദേശിക ഭരണകർത്താക്കൾ ദുരിതബാധിതർക്ക് എല്ലാ സഹായവും നൽകുന്നുണ്ടെന്ന് പ്രധാനമന്ത്രി ട്വീറ്റ് ചെയ്തു.അപകടത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് ദുരിതാശ്വാസ നിധിയിൽ നിന്നും രണ്ട് ലക്ഷം വീതം അനുവദിക്കും. പരിക്കേറ്റവർക്ക് 50,000 രൂപയും സഹായ ധനം നൽകുമെന്ന് പ്രധാനമന്ത്രിയുടെ ഓഫീസ് വ്യക്തമാക്കി.
ഗുജറാത്ത് മന്ത്രി ബ്രിജേഷ് മെർജയും അനുശോചനം രേഖപ്പെടുത്തി. അപകടത്തിൽപ്പെട്ടവരുടെ കുടുംബാംഗങ്ങളുടെ ദുഃഖത്തിൽ സർക്കാർ പങ്കുചേരുന്നതായി അദ്ദേഹം പറഞ്ഞു.
അതേസമയം അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ രക്ഷിക്കാനുള്ള ശ്രമം തുടരുകയാണ്. 20 പേരെ ഇതുവരെ ആശുപത്രിയിലേക്ക് മാറ്റി. 30 ലധികം പേർ കുടുങ്ങിക്കിടക്കുന്നുണ്ടെന്നാണ് വിവരം.
