ഇസ്ലാമാബാദ്: ഇന്ത്യയിൽ പെട്രോൾ- ഡീസൽ വില കുറച്ച മോദി സർക്കാരിന് പ്രശംസയുമായി പാകിസ്താൻ മുൻ പ്രധാനമന്ത്രി ഇമ്രാൻ ഖാൻ. പാകിസ്താൻ സർക്കാരും ഇന്ധന വില കുറയ്ക്കുന്നതിനുള്ള പ്രവർത്തനങ്ങളിലാണെന്നും ഇമ്രാൻ ഖാൻ പറഞ്ഞു. ഇന്ത്യ ഇന്ധന നികുതി കുറച്ചുവെന്ന വാർത്തകൾ പുറത്തുവന്നതിന് പിന്നാലെ ട്വിറ്ററിലൂടെയായിരുന്നു പ്രശംസയുമായി ഇമ്രാൻ ഖാൻ രംഗത്തുവന്നത്.
ക്വാഡിന്റെ ഭാഗമായിരുന്നിട്ടും അമേരിക്കയുടെ സമ്മർദ്ദങ്ങൾക്ക് വഴങ്ങാതെയും, റഷ്യയിൽ നിന്നും കുറഞ്ഞ നിരക്കിൽ ഇന്ധനം വാങ്ങിയുമാണ് ഇന്ത്യൻ സർക്കാർ വില കുറച്ചത്. ഇത് ജനങ്ങൾക്ക് വലിയ ആശ്വസമാണ്. സ്വതന്ത്ര വിദേശ നയത്തിന്റെ സഹായത്തോടെ ഇതേ കാര്യം നേടിയെടുക്കുക ലക്ഷ്യമിട്ടാണ് പാക് സർക്കാരും പ്രവർത്തിക്കുന്നതെന്നും ഇമ്രാൻ ഖാൻ പറഞ്ഞു. നിലവിലെ പാക് പ്രധാനമന്ത്രി ഷെഹബാസ് ഷെരിഫിനെയും, അദ്ദേഹം നേതൃത്വം നൽകുന്ന സർക്കാരിനെയും ഇമ്രാൻ ഖാൻ രൂക്ഷമായി വിമർശിച്ചു.
പാകിസ്താന്റെ താത്പര്യങ്ങൾ സംരക്ഷിക്കുന്നതാകണം സർക്കാർ. എന്നാൽ വിദേശ ശക്തികൾക്ക് അധീനപ്പെട്ടാണ് ഇവിടെ സർക്കാരിന്റെ പ്രവർത്തനം. പുതിയ സർക്കാരിന് കീഴിൽ പാക് സമ്പദ്വ്യവസ്ഥ ഇഴഞ്ഞു നീങ്ങുകയാണെന്നും ഇമ്രാൻ ഖാൻ വിമർശിച്ചു.
Comments