മൃഗശാലയിലെ സിംഹക്കൂട്ടിൽ കൈയ്യിട്ട് സന്ദർശകൻ; തിരിച്ചെടുത്തപ്പോൾ വിരലിലെ മാംസം സിംഹത്തിന്റെ വായിൽ

കിംഗ്‌സ്റ്റൺ: മൃഗശാലയിലെ കൂടിനുള്ളിൽ കിടക്കുന്ന മൃഗങ്ങളുടെ സമീപത്തേക്ക് പോകരുതെന്നാണ് നിർദേശം. എന്നാൽ സന്ദർശകർ പലപ്പോഴും ഇത് അവഗണിച്ച് മൃഗങ്ങളുടെ അടുത്തേക്ക് പോകുകയും കൈകൾ കൂടിനുള്ളിലേക്ക് ഇടുകയും ചെയ്യാറുണ്ട്. അപകടകരമായ ഈ പ്രവൃത്തിയിലൂടെ ജീവൻ പോലും നഷ്ടപ്പെട്ടേക്കാം. ഇക്കാര്യം ഓർമ്മപ്പെടുത്തുന്ന ഒരു വീഡിയോയാണ് സമൂഹമാദ്ധ്യമങ്ങളിൽ ഇപ്പോൾ വൈറലാകുന്നത്.

Show off bring disgrace

The lion at Jamaica Zoo ripped his finger off. pic.twitter.com/Ae2FRQHunk

— Ms blunt from shi born 🇯🇲 “PRJEFE” (@OneciaG) May 21, 2022

ജമൈക്കയിലെ മൃഗശാലയിൽ നിന്നുള്ള കാഴ്ചയാണിത്. കൂട്ടിൽ കിടക്കുന്ന സിംഹത്തെ താലോലിക്കാൻ ചെന്ന യുവാവിനാണ് പണികിട്ടിയത്. ഇയാൾ കൂടിനുള്ളിലൂടെ കൈവിരലുകൾ കടത്തി സിംഹത്തിന്റെ ജടയിലും വായിലും തൊട്ടുനോക്കാൻ ശ്രമിക്കുകയാണ്. ഇതിനിടെ അയാളുടെ കൈവിരലുകൾ കടിച്ചെടുക്കാൻ സിംഹം ശ്രമിക്കുന്നതും കാണാം. എന്നാൽ മറ്റ് സന്ദർശകർക്ക് മുമ്പിൽ താരമാകാനുള്ള ശ്രമത്തിന്റെ ഭാഗമായി വീണ്ടും വീണ്ടും സിംഹത്തിന്റെ വായിലേക്ക് വിരലിടുകയാണ് യുവാവ്. ഒടുവിൽ ഭയപ്പെട്ടത് തന്നെ സംഭവിക്കുന്നു.

യുവാവിന്റെ ഒരു വിരൽ സിംഹത്തിന്റെ വായയിൽ അകപ്പെട്ടു. തിരികെ വലിച്ചെടുക്കാൻ ആവുന്നത്ര ശ്രമിച്ചെങ്കിലും നടക്കുന്നില്ല. മിനിറ്റുകൾക്കപ്പുറം കൈവലിച്ചെടുത്തപ്പോൾ വിരലിന്റെ സ്ഥാനത്ത് എല്ല് മാത്രമാണ് യുവാവിന് കാണാനായത്.

താരമാകാൻ ശ്രമിച്ച് മാനക്കേട് വാങ്ങിയെന്നാണ് വീഡിയോ പങ്കുവെച്ച ട്വിറ്റർ ഉപയോക്താവ് ദൃശ്യങ്ങൾക്ക് അടിക്കുറിപ്പ് നൽകിയത്. 28 സെക്കൻഡ് മാത്രം ദൈർഘ്യമുള്ള ഈ വീഡിയോ ദൃശ്യങ്ങൾ ആളുകൾക്ക് ഒരു മുന്നറിയിപ്പ് കൂടിയാണ്.