കൊച്ചി: ഹൈക്കോടതി ജഡ്ജിമാരെ ആക്ഷേപിക്കുന്ന പരാമർശം നടത്തിയ പോപ്പുലർ ഫ്രണ്ട് നേതാവിനെതിരെ കോടതിയലക്ഷ്യ നടപടിക്ക് അനുമതി തേടി ഹർജി. ഹൈക്കോടതി അഭിഭാഷകനായ അരുൺ റോയ് ആണ് അഡ്വക്കേറ്റ് ജനറലിന് അപേക്ഷ നൽകിയത്. യഹിയാ തങ്ങൾക്കെതിരെ ക്രിമിനൽ നടപടി പ്രകാരമുളള തുടർ നടപടികൾ സ്വീകരിക്കാൻ അനുമതി വേണമെന്നാണ് ആവശ്യം. അഡ്വക്കേറ്റ് ജനറൽ ആണ് ഇക്കാര്യത്തിൽ തീരുമാനമെടുക്കേണ്ടത്.
ജഡ്ജിമാർക്കെതിരായ പോപ്പുലർ ഫ്രണ്ട് സംസ്ഥാന സമിതിയംഗം യഹിയാ തങ്ങളുടെ പരാമർശം അപകീർത്തികരമെന്നാണ് പരാതിയിൽ ഉന്നയിച്ചിരിക്കുന്നത്. ആലപ്പുഴ റാലിയിൽ വിദ്വേഷ മുദ്രാവാക്യം വിളിച്ച സംഭവത്തിൽ പോപ്പുലർ ഫ്രണ്ട് തീവ്രവാദികളെ കസ്റ്റഡിയിലെടുത്തതിൽ പ്രതിഷേധിച്ച് പിഎഫ്‌ഐ എസ്പി ഓഫീസിലേക്ക് നടത്തിയ മാർച്ചിലായിരുന്നു യഹിയാ തങ്ങൾ വിവാദ പരാമർശം നടത്തിയത്.
പി.സി ജോർജ്ജിന് ജാമ്യം അനുവദിച്ച ജഡ്ജിയെയും ആലപ്പുഴ റാലിയുമായി ബന്ധപ്പെട്ട കേസ് പരിഗണിക്കുന്ന ജഡ്ജിമാരെയും ലക്ഷ്യമിട്ടായിരുന്നു പരാമർശം. ആലപ്പുഴ സമ്മേളനത്തിലെ മുദ്രാവാക്യം കേട്ടുകൊണ്ട് നമ്മുടെ ഹൈക്കോടതി ജഡ്ജിമാർ ഞെട്ടുകയാണ്. എത്ര പെട്ടന്നാണ് ഇവർ ഞെട്ടുന്നതെന്ന് അറിയാമോയെന്നും ജഡ്ജിമാർ ഇട്ടിരിക്കുന്ന അടിവസ്ത്രം കാവിയാകുമ്പോൾ ചൂടെടുക്കുമെന്നും സ്വാഭാവികമാണെന്നുമായിരുന്നു യഹിയാ തങ്ങളുടെ വാക്കുകൾ.
ആലപ്പുഴയിലെ വിദ്വേഷ റാലി സംഘടിപ്പിച്ച സംഭവത്തിൽ മുഖ്യ സംഘാടകനായിരുന്ന യഹിയാ തങ്ങളെ ആലപ്പുഴ പോലീസ് ഇന്നലെ അറസ്റ്റ് ചെയ്തിരുന്നു.
