വാഷിംഗ്ടൺ: സാമൂഹ്യമാദ്ധ്യമ ഭീമനായ വാട്സ്ആപ്പ് പുത്തൻ ഫീച്ചറുകൾ അവതരിപ്പിക്കാൻ പദ്ധതിയിടുന്നു.സുരക്ഷയ്ക്കും ഉപഭോക്താക്കളുടെ ഏറെ നാളുകളായുള്ള ആവശ്യങ്ങൾക്കുമാണ് ഇത്തവണ വാട്സ്ആപ്പ് പ്രാധാന്യം നൽകുന്നത്.
ഡിലീറ്റ് ചെയ്ത സന്ദേശങ്ങൾ വീണ്ടെടുക്കാനുള്ള പുതിയ ടൂളാണ് അതിലൊന്ന്. നിലവിൽ അയച്ച സന്ദേശങ്ങൾ ഡിലീറ്റ് ചെയ്യാനുള്ള ഓപ്ഷൻ ആപ്പിലുണ്ട്. എന്നിരുന്നാലും ചിലപ്പോൾ തിരക്കിനിടയിൽ ഡിലീറ്റ് ഫോർ എവരി വൺ എന്ന ഓപ്ഷനുപകരം ഡിലീറ്റ് ഫോർ മി അമർത്തി അബദ്ധം പറ്റാറുണ്ട്. എന്നാൽ പുതിയ ഫീച്ചർ വരുന്നതിലൂടെ ‘ഡിലീറ്റ് ഫോർ മി’ എന്ന ഓപ്ഷൻ അമർത്തി നിങ്ങൾ ഇല്ലാതാക്കിയ ചാറ്റ് വീണ്ടെടുക്കാൻ പുതിയ ഫീച്ചർ വഴി സാധിക്കും അതിന് അൺഡു ബട്ടൺ സഹായിക്കും.
അയച്ച സന്ദേശങ്ങൾ എഡിറ്റ് ചെയ്യാനുള്ള ഫീച്ചറാണ് മറ്റൊന്ന്. ഒരാൾക്ക് അയച്ച സന്ദേശങ്ങൾ നീക്കം ചെയ്യാതെ തന്നെ എഡിറ്റ് ചെയ്യാൻ സാധിക്കുന്ന സൗകര്യം വാട്സ്ആപ്പ് പരിശോധിക്കുന്നതായാണ് റിപ്പോർട്ടുകൾ. സന്ദേശങ്ങളിൽ അക്ഷരതെറ്റോ, പിഴവുകളോ വരുമ്പോഴും മറ്റും ആവശ്യമായ തിരുത്തുകൾ വരുത്താൻ പറ്റുന്നതാണ് പുതിയ ഫീച്ചർ.
സുരക്ഷ വർദ്ധിപ്പിക്കുന്നതാണ് മറ്റൊരു ഫീച്ചർ. ഇതിനായി ഡബിൾ വെരിഫിക്കേഷൻ കോഡ് പരീക്ഷണഘട്ടത്തിലാണ്. മൂന്ന് ഫീച്ചറുകളും ഒന്നിനുപിറകെ ഒന്നായി ഉടൻ തന്നെ ഉപഭോക്താവിലേക്ക് എത്തും എന്നാണ് വിവരം.
