ഡൽഹി: കറൻസി നോട്ടിൽ ഗാന്ധിജിയുടെ ചിത്രത്തിത്തിനൊപ്പം രവീന്ദ്രനാഥ് ടാഗോറിന്റെയും എപിജെ അബ്ദുൾ കലാമിന്റെയും ചിത്രങ്ങൾ കൂടി ഉൾപ്പെടുത്തുമെന്ന പ്രചാരണങ്ങളിൽ വിശദീകരണവുമായി റിസർവ് ബാങ്ക് ഓഫ് ഇന്ത്യ. കറൻസി നോട്ടുകളിൽ മാറ്റം വരുത്താൻ ഒരു ആലോചനയും നിലവിലില്ലെന്ന് റിസർവ് ബാങ്ക് വ്യക്തമാക്കി. പ്രസ്താവനയിലൂടെയാണ് ആർബിഐ ഇക്കാര്യം അറിയിച്ചത്.
ഗാന്ധിജിക്കൊപ്പം മറ്റ് ദേശീയ പ്രാധാന്യമുള്ള നേതാക്കളുടെ ചിത്രങ്ങളും കറൻസി നോട്ടുകളിൽ ഉപയോഗിക്കണമെന്ന് വിവിധ കോണുകളിൽ നിന്നും അഭിപ്രായങ്ങൾ ഉയരുന്നുണ്ട്. നേതാജി സുഭാഷ് ചന്ദ്ര ബോസിന്റെ ചിത്രം കറൻസി നോട്ടുകളിൽ ഉൾപ്പെടുത്തണമെന്ന ആവശ്യത്തിൽ നേരത്തേ കൽക്കത്ത ഹൈക്കോടതി കേന്ദ്ര സർക്കാരിനോട് പ്രതികരണം തേടിയിരുന്നു.
സമാനമായ ഹർജി 2021ൽ മദ്രാസ് ഹൈക്കോടതിയിലും എത്തിയിരുന്നു. എന്നാൽ കോടതി അന്ന് ഹർജി തള്ളുകയായിരുന്നു.
