വാഷിംഗ്ടൺ: ഇൻഡോ- പസഫിക് മേഖലയിൽ സൈനിക പിരിമുറുക്കം സൃഷ്ടിക്കാനുള്ള നീക്കവുമായി ചൈന. കംബോഡിയയിൽ സൈനിക ആവശ്യങ്ങൾക്കായി ചൈന നാവിക താവളം നിർമ്മിക്കുന്നതായി അമേരിക്കൻ മാദ്ധ്യമം റിപ്പോർട്ട് ചെയ്യുന്നു. കംബോഡിയയിലെ റീം നാവിക താവളത്തിന് സമീപമാണ് ചൈന നിർമ്മാണ പ്രവർത്തനങ്ങൾ നടത്തുന്നത്.
കിഴക്കൻ ആഫ്രിക്കൻ രാജ്യമായ ജിബൂട്ടിയിൽ ചൈന നിർമ്മിച്ചതിന് സമാനമായ നാവിക താവളമാണ് റീമിൽ നിർമ്മിക്കാൻ ഒരുങ്ങുന്നത് എന്നാണ് വിവരം. അടിയന്തര സാഹചര്യത്തിൽ സൈനിക നീക്കം നടത്താൻ വേണ്ടിയാണ് ചൈന ഇത്തരത്തിൽ നിർമ്മാണ പ്രവർത്തനങ്ങൾ നടത്തുന്നത് എന്ന് ലോകരാജ്യങ്ങൾ ആശങ്കപ്പെടുന്നു. വലിയ കപ്പലുകൾ അടുപ്പിക്കാൻ പറ്റുന്ന തരത്തിലാണ് നിർമ്മാണമെന്നാണ് റിപ്പോർട്ട്.
അതേസമയം ഇത്തരത്തിലുള്ള വാർത്തകൾ ചൈനയും കംബോഡിയയും തള്ളിക്കളയുകയാണ്.
