ലഖ്നൗ: കാൺപൂർ കലാപക്കേസിൽ ഇതുവരെ 50 പേർ അറസ്റ്റിലായതായി ഉത്തർ പ്രദേശ് പോലീസ്. കൂടുതൽ അറസ്റ്റുകൾ ഉടൻ ഉണ്ടാകുമെന്നും അന്വേഷണ ഉദ്യോഗസ്ഥൻ ആനന്ദ് പ്രകാശ് തിവാരി മാദ്ധ്യമങ്ങളോട് പറഞ്ഞു. കലാപവുമായി ബന്ധപ്പെട്ട് അക്രമം അഴിച്ചുവിട്ട 40 പേരുടെ ചിത്രങ്ങൾ കഴിഞ്ഞ ദിവസം പോലീസ് പുറത്തു വിട്ടിരുന്നു.
അതേസമയം കാൺപൂരിലെ അനധികൃത നിർമ്മാണങ്ങൾ ബുൾഡോസറുകൾ ഉപയോഗിച്ച് പൊളിച്ചു നീക്കാനുള്ള നടപടികൾക്ക് തദ്ദേശ ഭരണകൂടങ്ങൾ നീക്കം ആരംഭിച്ചതായാണ് വിവരം. കലാപകാരികളിൽ പലരുടെയും ഉടമസ്ഥതയിൽ ഉള്ള കെട്ടിടങ്ങൾ ഇവയിൽ ഉൾപ്പെടും. അനധികൃതമായി നിർമ്മിച്ച കെട്ടിടങ്ങൾ അക്രമികൾ കലാപം നടത്താൻ ഉപയോഗിച്ചതായി കാൺപൂർ ജില്ലാ മജിസ്ട്രേറ്റ് കണ്ടെത്തിയിരുന്നു.
ഒരു ടെലിവിഷൻ സംവാദത്തിൽ പ്രവാചകനുമായി ബന്ധപ്പെട്ട് നൂപുർ ശർമ്മ നടത്തിയ പരാമർശത്തിന്റെ പേരിൽ ജൂൺ 3നായിരുന്നു അക്രമികൾ കാൺപൂരിൽ കലാപത്തിന് ശ്രമിച്ചത്. പരാമർശത്തിൽ പ്രതിഷേധിച്ച് കടകൾ അടയ്ക്കാനുള്ള ഒരു വിഭാഗത്തിന്റെ നിർദ്ദേശം തള്ളിയ വ്യാപാരികൾക്കെതിരെ ചിലർ അക്രമം അഴിച്ചു വിടുകയായിരുന്നു.
