ബാങ്കോക്ക്: മരുന്നാവശ്യത്തിനായി കഞ്ചാവ് കൃഷി നിയമ വിധേയമാക്കുന്ന ആദ്യ ഏഷ്യന് രാജ്യമായി തായ്ലന്റ്. ഇനി വീടുകളില് കഞ്ചാവ് ചെടി വളര്ത്താനാകും. എന്നാല് ലൈസന്സ് ഇല്ലാതെ വാണിജ്യ ആവശ്യങ്ങള്ക്കായി ഉപയോഗിക്കരുത്. കഞ്ചാവ് ചേര്ത്ത ഭക്ഷണവും പാനീയങ്ങളും കഫേകളിലും റെസ്റ്റോറന്റുകളിലും വിതരണം ചെയ്യാനും അനുമതി നല്കിയിട്ടുണ്ട്. എന്നാല് ഇത്തരത്തില് ഭക്ഷണത്തില് കലര്ത്തുമ്പോള് കഞ്ചാവിലടങ്ങിയിട്ടുളള ലഹരിയായ ടെട്രാഹൈഡ്രോകനാബിനോള് 0.2 ശതമാനത്തില് കൂടരുതെന്നാണ് നിബന്ധന.
പൊതുനിരത്തില് കൂട്ടം ചേര്ന്ന് കഞ്ചാവ് ഉപയോഗിക്കാന് പാടില്ല. വിനോദത്തിനായോ മറ്റുള്ളവര്ക്ക് ഉപദ്രവകരമായ രീതിയിലോ കഞ്ചാവ് ഉപയോഗിച്ചാല് കര്ശന നടപടി ഉണ്ടാകുമെന്നും ആരോഗ്യ മന്ത്രി അറിയിച്ചു.മൂന്ന് മാസം തടവും 800 ഡോളറുമാണ് പിഴ.
സമ്പദ്ഘടന മെച്ചപ്പെടുത്തുക എന്ന ലക്ഷ്യത്തോടെ ജൂണ് മാസത്തില് ഒരു മില്യണ് കഞ്ചാവ് ചെടികള് വീടുകളില് വളര്ത്താന് തായ്ലന്റ് സര്ക്കാര് പദ്ധതിയിട്ടിരുന്നു. കാര്ഷിക മേഖലയില് മാറ്റങ്ങള് സൃഷ്ടിക്കാന് കഴിയുമെന്ന് പ്രതീക്ഷിക്കുന്നതായി മന്ത്രി പറഞ്ഞു. സ്വതന്ത്രമായി പുകവലിക്കാനായി വിദേശികള് രാജ്യത്ത് എത്തരുതെന്ന് മന്ത്രി മുന്നറിയിപ്പ് നല്കി.ആരോഗ്യവുമായി ബന്ധപ്പെട്ട് കഞ്ചാവ് ഉപയോഗിക്കുന്നതില് തെറ്റില്ലെന്നും മന്ത്രി വ്യക്തമാക്കി.
വിനോദ ആവശ്യത്തിനായി കഞ്ചാവ് നിയമവിധേയമാക്കിയ രാജ്യങ്ങളില് കാനഡ,ജോര്ജിയ, മൊക്സിക്കോ തുടങ്ങിയ 19 രാജ്യങ്ങള് ഉള്പ്പെടുന്നു. ഡെന്മാര്ക്ക്, ഫിന്ലന്ഡ്, ജെര്മനി, ശ്രീലങ്ക തുടങ്ങിയ 37 രാജ്യങ്ങളില് മരുന്നാവശ്യത്തിനായി കഞ്ചാവ് ഉപയോഗിക്കുന്നത് നിയമ വിധേയമാണ്.
Comments