ചണ്ഡീഗഡ്: ഗായകനും കോൺഗ്രസ് നേതാവുമായ സിദ്ധുമ മൂസേവാല വെടിയേറ്റ് കൊല്ലപ്പെട്ട സംഭവത്തിൽ ഒരാൾ കൂടി അറസ്റ്റിൽ. കൊലപാതകസംഘത്തിലെ ആദ്യ അറസ്റ്റാണിത്.സന്തോഷ് ജാവദ് എന്നയാളാണ് പിടിയിലായത്. പൂനെയിൽ വെച്ചാണ് ഇയാളെ പിടികൂടിയത്.
ലോറൻസ് ബിഷ്ണോയി സംഘത്തിലെ അംഗമാണ് പിടിയിലായ സന്തോഷ്. 2021 ൽ പൂനെയിൽ നടന്ന മറ്റൊരു കൊലപാതകവുമായി ബന്ധപ്പെട്ട് ഇയാൾ ഒളിവിലായിരുന്നു. അതിനിടയിലാണ് സന്തോഷ് സിദ്ധു മൂസേവാലയുടെ കൊലപാതകത്തിലും പങ്കു ചേരുന്നത്. സന്തോഷ് ജാവദിന് അഭയം നൽകിയ മഹാകൽ എന്നറിയപ്പെടുന്ന സിദ്ധേഷ് കാബ്ല നേരത്തെ പിടിയിലായിരുന്നു. ഇയാളിൽ നിന്നാണ് നിർണായക വിവരങ്ങൾ ലഭിച്ചത്.
തടവിൽ കഴിയുന്ന കുപ്രസിദ്ധഗുണ്ടാ നേതാവ് ലോറൻസ് ബിഷ്ണോയിയാണ് സിദ്ധുവിന്റെ കൊലപാതകക്കേസിലെ മുഖ്യസൂത്രധാരനെന്ന് കണ്ടെത്തിയിരുന്നു.കാനഡയിൽ കഴിയുന്ന ഗുണ്ട ഗോൾഡി ബ്രാറും കൊലപാതകത്തിന്റെ ഉത്തരവാദിത്വം ഏറ്റെടുത്തതോടെ അന്വേഷണം ലോറൻസ് ബിഷ്ണോയുടെ സംഘത്തെ കേന്ദ്രീകരിച്ചാക്കിയിരുന്നു.
കഴിഞ്ഞ മെയ് 29 നാണ് സിദ്ധു മൂസേവാല വെടിയേറ്റ് കൊല്ലപ്പെടുന്നത്. സുഹൃത്തുക്കളോടൊപ്പം സഞ്ചരിക്കുമ്പോഴായിരുന്നു കൊലപാതകം. പഞ്ചാബിൽ എഎപി സർക്കാർ സിദ്ധു ഉൾപ്പടെയുള്ള 424 വിഐപിമാരുടെ സുരക്ഷ പിൻവലിച്ചതിന് തൊട്ടു പിന്നാലെയായിരുന്നു കൊലപാതകം. ഇത് ഭഗവന്ത് സർക്കാരിന് വലിയ ആഘാതമേൽപ്പിച്ചിരുന്നു.
Comments