പാലക്കാട്: ബിരിയാണി ചെമ്പ് വഴിയുള്ള കള്ളക്കടത്തിൽ മുഖ്യമന്ത്രിയ്‌ക്കെതിരെ പ്രതിഷേധിച്ച കോൺഗ്രസ് വനിതാ പ്രവർത്തകരെ അപമാനിച്ച് ഇടത് എംഎൽഎ. നെന്മാറ എംഎൽഎ കെ ബാബുവാണ് വനിതാ പ്രവർത്തകർക്കെതിരെ അധിക്ഷേപ പരാമർശമുന്നയിച്ചത്. സംഭവത്തിൽ എംഎൽഎയ്‌ക്കെതിരെ ശക്തമായ പ്രതിഷേധവുമായി കോൺഗ്രസ് രംഗത്ത് എത്തി.
മുഖ്യമന്ത്രിയ്‌ക്കെതിരെ തുടരുന്ന പ്രതിഷേധത്തിനെതിരെ പല്ലശ്ശനയിൽ സംഘടിപ്പിച്ച യോഗത്തിലായിരുന്നു എംഎൽഎയുടെ അധിക്ഷേപ പരാമർശം. സ്ത്രീകൾ കയറി കഴിഞ്ഞാൽ പിന്നെ അവർ സമരത്തിന്റെ മുൻപിൽ നിൽക്കും. ബാരിക്കേഡ് തീർത്തിട്ടുണ്ടെങ്കിൽ അതിന് മുകളിലായി ചാടി കയറും. മുകളിൽ എത്തിയില്ല എങ്കിൽ പുറകിൽ നിന്നും തള്ളിക്കൊടുക്കും എന്നായിരുന്നു എംഎൽഎ പറഞ്ഞത്.
കഴിഞ്ഞ ദിവസം സമരത്തിനിടെ ബാരിക്കേഡിന് മുകളിൽ കയറാൻ ശ്രമിച്ച വനിതാ കോൺഗ്രസ് പ്രവർത്തകയ്‌ക്കെതിരെ വ്യാപക സൈബർ ആക്രമണം നടന്നിരുന്നു. ഇത് പരോക്ഷമായി പരാമർശിച്ചുകൊണ്ടാണ് കോൺഗ്രസ് വനിതാ നേതാക്കളെ എംഎൽഎ ഒന്നടങ്കം അധിക്ഷേപിച്ചത്.
അതേസമയം പ്രസ്താവനയിൽ ഉറച്ചു നിൽക്കുന്നുവെന്ന് കെ. ബാബു പറഞ്ഞു. താൻ പറഞ്ഞതിൽ എന്താണ് തെറ്റ്. സമരത്തിനിടെയുണ്ടായ സംഭവത്തിന്റെ ചിത്രങ്ങളും, വീഡിയോകളും എല്ലാവരും കണ്ടതാണ്. അതിനെയാണ് സൂചിപ്പിച്ചത് എന്നാണ് എംഎൽഎയുടെ വാദം.
