യുഎഇയിലെ ഹൈവേകളില് അതിവേഗ ഇലക്ട്രിക് വാഹന ചാര്ജിങ് സ്റ്റേഷനുകള് സ്ഥാപിക്കാന് പദ്ധതി. ഇലക്ട്രിക് വാഹനങ്ങളുടെ ഉപയോഗം പ്രോത്സാഹിപ്പിക്കുന്നത് ലക്ഷ്യമിട്ടാണ് പദ്ധതി നടപ്പാക്കുന്നത്. ഇതു സംബന്ധിച്ച് യുഎഇ ഊര്ജ-അടിസ്ഥാന സൗകര്യ മന്ത്രാലയം ‘സീമന്സ്’ ടെക്നോളജിയുമായി കരാറില് ഒപ്പുവെച്ചു.
സുസ്ഥിര ഗതാഗത സംവിധാനത്തിന് അടിസ്ഥാന സൗകര്യങ്ങള് വികസിപ്പിക്കുകയാണ് മന്ത്രാലയം പദ്ധതിയിലൂടെ ലക്ഷ്യം വെക്കുന്നത്. ഇലക്ട്രിക് വാഹന ഉപയോഗം വര്ധിക്കുന്നത് കാര്ബണ് പുറന്തള്ളല് കുറക്കുകയും പരിസ്ഥിതി ആഘാതങ്ങള് ഇല്ലാതാക്കുകയും ചെയ്യും. പദ്ധതി പ്രകാരം റാസല്ഖൈമ, അജ്മാന്, ഉമ്മുല്ഖുവൈന്, ഫുജൈറ എന്നിവിടങ്ങളിലെ ഹൈവേകളിലാണ് ചാര്ജിങ് സ്റ്റേഷനുകള് സ്ഥാപിക്കുക. വളരെ വേഗത്തില് ചാര്ജ് ചെയ്യാനാവുന്ന സീമെന്സ് സിചാര്ജ് ഡി 160 കെ.വി അള്ട്രാ ഫാസ്റ്റ് സംവിധാനമാണ് സ്ഥാപിക്കുന്നത്.
വിപണിയില് ഇ.വി വാഹന ഉപയോക്താക്കളുടെ എണ്ണം വര്ധിച്ചതോടെയാണ് നീക്കം. നിലവില് ദുബായില് മാത്രം 560 ചാര്ജിങ് സ്റ്റേഷനുകള് നിലവിലുണ്ട്. ദുബായ് വൈദ്യുതി-ജല അതോറിറ്റിയാണ് സ്റ്റേഷനുകൾ നിയന്ത്രിക്കുന്നത്. ഇവിടങ്ങളില് രജിസ്റ്റര് ചെയ്തവര്ക്കും അല്ലാത്തവര്ക്കും ചാര്ജ് ചെയ്യാന് സൗകര്യമുണ്ട്.
