ന്യൂഡൽഹി : ഇന്നലെ രാത്രി മുതൽ പെയ്ത മഴയിൽ ഡൽഹിയിൽ പലയിടത്തും വെളളക്കെട്ട്. കഴിഞ്ഞ രാത്രിയിലും ഇന്ന് പുലർച്ചെയുമായിട്ടായിരുന്നു മഴ. വെള്ളക്കെട്ട് നഗരത്തിന്റെ വിവിധ ഭാഗങ്ങളിൽ ഗതാഗത കുരുക്കിന് കാരണമായി. പാണ്ഡവ് നഗർ, ഭൈരവ് ബാബ റോഡ് എന്നിവിടങ്ങളിലാണ് പ്രധാനമായും ഗതാഗത കുരുക്ക് രാവിലെ അനുഭവപ്പെട്ടത്.
നഗരത്തിൽ അനുഭവപ്പെടുന്ന കനത്ത ചൂടിന് മഴ നേരിയ തോതിൽ ആശ്വാസമായി .ഒപ്പം അന്തരീക്ഷ വായുവിന്റെ നിലവാരവും മെച്ചപ്പെടുത്തിയിട്ടുണ്ടെന്ന് കാലാവസ്ഥാ വിദഗ്ധർ പറയുന്നു.അതേസമയം ചണ്ഡിഗഢ് പോലുള്ള സമീപ പ്രദേശങ്ങളിൽ തെളിഞ്ഞ കലാവസ്ഥ രേഖപ്പെടുത്തി.
വരും ദിവസങ്ങളിൽ വിവിധ ഭാഗങ്ങളിൽ മഴയ്ക്ക് സാധത്യയുണ്ടെന്ന് കേന്ദ്ര കലാവസ്ഥാ വകുപ്പ് അറിയിച്ചു.പശ്ചിമ ഹിമാലയൻ മേഖല ,പഞ്ചാബ്, ഹരിയാന, ചണ്ഡീഗഢ്, ഡൽഹി, ഉത്തർപ്രദേശ് എന്നിവിടങ്ങളിൽ വ്യാപകമായ മഴയ്ക്ക് സാധ്യതയുണ്ടെന്നാണ് അറിയിപ്പ് .ജൂൺ 17,18 തീയതികളിൽ ജമ്മു , ഹിമാചൽ പ്രദേശ്, ഉത്തരാഖണ്ഡ് എന്നിവിടങ്ങളിൽ ഒറ്റപ്പെട്ട കനത്ത മഴയ്ക്കും സാധ്യതയുണ്ട്.
ഡൽഹിയിൽ കഴിഞ്ഞ ദിവസം രേഖപ്പെടുത്തിയ കുറഞ്ഞ താപനില 31 ഡിഗ്രി സെൽഷ്യസാണ് .ഇത് 40 ഡിഗ്രി വരെ ഉയരുമെന്നും മുന്നറിയിപ്പുണ്ടായിരുന്നു. ഇതിനിടെയാണ് ആശ്വാസമായി മഴയെത്തിയത്.
Comments