നരസിംഹത്തിൽ ഇന്ദുചൂഢന്റെ അനുരാധയായും പാരിജാതം പരമ്പരയിലെ ആന്റിയമ്മയെന്ന ലളിതാ ഭായിയായും മലയാളികൾക്ക് ഏറെ സുപരിചതയായ നടിയാണ് ഐശ്വര്യ ഭാസ്കർ. പ്രജ, ബട്ടർഫ്ളൈസ്, അഗ്നിനക്ഷത്രം, ഇൻസ്പെക്ടർ ഗരുഡ്, നോട്ട്ബുക്ക്, നത്തോലി ഒരു ചെറിയ മീനല്ല തുടങ്ങി നിരവധി ചിത്രങ്ങളിൽ എത്തിയ ഐശ്വര്യ തെലുങ്ക്, കന്നട, തമിഴ് സിനിമാ മേഖലകളിൽ സജീവയായിരുന്നു. വിവിധ ഭാഷകളിലായി നിരവധി സീരിയലുകളിലൂടെയും എത്തിയ ഐശ്വര്യ കുടുംബ പ്രേക്ഷകർക്ക് പ്രിയപ്പെട്ടവളായി. എന്നാലിന്ന് അഭ്രപാളിയിൽ നിന്ന് മാറിനിൽക്കുന്ന ഐശ്വര്യ തന്റെ ജീവിതസാഹചര്യത്തെക്കുറിച്ച് തുറന്നുപറച്ചിൽ നടത്തിയിരിക്കുകയാണ്.
ഏറെ പ്രതിസന്ധിയിലൂടെയാണ് താനിപ്പോൾ ജീവിക്കുന്നതെന്ന് ഐശ്വര്യ പറയുന്നു. ജീവിക്കാൻ പണമില്ല, സിനിമകളില്ല, തെരുവുകൾ തോറും സോപ്പ് വിറ്റ് ലഭിച്ച് കിട്ടുന്ന പണമാണ് വരുമാന മാർഗമെന്നും ഒരു തമിഴ് മാദ്ധ്യമത്തിന് നൽകിയ അഭിമുഖത്തിൽ ഐശ്വര്യ വെളിപ്പെടുത്തി. അതേസമയം തനിക്ക് മറ്റ് സാമ്പത്തിക ബാധ്യതകൾ ഒന്നുമില്ലെന്ന് ഐശ്വര്യ പറയുന്നു. മകളുടെ വിവാഹം കഴിഞ്ഞു. ഇനി കുടുംബത്തിൽ താൻ മാത്രമാണുള്ളത്. എന്ത് ജോലിയും ചെയ്യാൻ തയ്യാറാണ്. യാതൊരു മടിയുമില്ലെന്നും ഐശ്വര്യ പ്രതികരിച്ചു.
വിവാഹമോചനം സംഭവിച്ചതിനെക്കുറിച്ചും നടി വെളിപ്പെടുത്തി. കല്യാണം കഴിഞ്ഞ് ആറ് മാസം കഴിഞ്ഞപ്പോഴേ ബന്ധം ശരിയാകില്ലെന്ന് തിരിച്ചറിഞ്ഞതാണ്. പിന്നീട് കുഞ്ഞ് ജനിച്ച് ഒന്നരവർഷം പിന്നിടപ്പോൾ തന്നെ വേർപിരിഞ്ഞു. പിന്നീട് പല പ്രണയബന്ധങ്ങളുണ്ടായെങ്കിലും അവയൊന്നും തന്നെ തന്റെ വ്യക്തിത്വം പണയപ്പെടുത്താതെ ജീവിക്കാൻ അനുവദിക്കുന്നതായിരുന്നില്ല. ഒരു വസ്ത്രം ധരിക്കുന്നതിൽ പോലും നിയന്ത്രണം ഏർപ്പെടുത്തുന്ന ബന്ധമാണെന്ന് തോന്നിയപ്പോൾ അവയുമായി മുന്നോട്ട് പോയില്ലായെന്നും ഐശ്വര്യ പ്രതികരിച്ചു.
