ശ്രീനിവാസനെ പോലെ തന്നെ അദ്ദേഹത്തിന്റെ മക്കളായ വിനീതിനും ധ്യാനിനും ഏറെ ആരാധകരുണ്ട്. അതുകൊണ്ട് ഇവരുടെ അഭിമുഖങ്ങളും മറ്റും ആരാധകർ ഏറെ പ്രതീക്ഷയോടെയാണ് കാത്തിരിക്കുന്നത്. എന്നാൽ ഇനി കുറച്ച് നാളത്തേക്ക് മാദ്ധ്യമങ്ങൾ അഭിമുഖങ്ങൾ കൊടുക്കാനില്ലെന്നാണ് ധ്യാൻ പറയുന്നത്. പ്രകാശൻ പറക്കട്ടെ എന്ന സിനിമയുടെ വിശേഷങ്ങൾ പങ്കുവയ്‌ക്കുന്നതിനിടെയാണ് ധ്യാൻ ഇങ്ങനെ പറഞ്ഞത്.
‘ ഇനി അഭിമുഖം കൊടുക്കേണ്ടെന്നാണ് വീട്ടിൽ നിന്നും മുന്നറിയിപ്പ് നൽകുന്നത്. അച്ഛൻ ആശുപത്രിയിൽ നിന്ന് വീട്ടിൽ എത്തിയിട്ടുണ്ട്. അതുകൊണ്ട് നല്ല കുട്ടിയായി ഒതുങ്ങിക്കൂടി വീട്ടിലിരിക്കാം എന്ന് വിചാരിച്ചു. ഇനി കുറച്ച് നാളത്തേക്ക് ലളിത ജീവിതമായിരിക്കും. അഭിമുഖങ്ങളും അടുത്തൊന്നും ഉണ്ടാകില്ല. കാരണം പുതിയ സിനിമകൾ അടുത്തൊന്നും റിലീസാകാനില്ല. ഞാൻ സോളോ ഇന്റർവ്യൂ കൊടുക്കുന്നത് അവസാനിപ്പിക്കണം എന്നാണ് കുടുംബക്കാരുടെ അഭിപ്രായം. ഇങ്ങനെ പോയാൽ ഞാൻ കുടംബക്കാരെ മുഴുവൻ നാറ്റിക്കും എന്നൊരു പേടി അവർക്കെല്ലാം ഉണ്ട്.
അച്ഛന്റേയും ഏട്ടന്റേയും എന്റെയും കാര്യങ്ങൾ മാത്രമേ ഇത് വരെ പറഞ്ഞിട്ടുള്ളു. ബാക്കിയുള്ള ബന്ധുക്കളെ കൂടി ഞാൻ നാറ്റിക്കുമോ എന്നൊരു പേടി അവർക്കുണ്ട്. ഇപ്പോൾ ഫാമിലി വാട്‌സ്ആപ്പ് ഗ്രൂപ്പിൽ നിന്ന് എല്ലാം പുറത്താണ്. കുറച്ച് ദിവസത്തിനുള്ളിൽ അതിലേക്ക് ചേർക്കും. അതുകൊണ്ട് തന്നെ നല്ല കുട്ടിയായി ഇരിക്കാം എന്ന് വിചാരിക്കുന്നു.
ഇന്റർവ്യൂ കണ്ടിട്ട് ഒരുപാട് പേർ വിളിക്കാറുണ്ട്. സിനിമ കണ്ടിട്ട് പോലും ഇത്രയും ആൾക്കാർ വിളിച്ചിട്ടില്ല. കഴിഞ്ഞ മൂന്ന് മാസത്തിനിടയിൽ വന്ന ഇന്റർവ്യൂ കണ്ടിട്ട് കുറേ ആളുകൾ വിളിച്ചു. പഴയ കഥകളൊക്കെയാണ് അതിൽ പറഞ്ഞിരുന്നത്. ഇനിയുള്ള എന്റെ അനുഭവങ്ങളൊക്കെ രണ്ട് ചാപ്റ്റർ ഉള്ള ഒരു സിനിമ ആക്കാം. അതുകൊണ്ട് ഇന്റർവ്യൂ കുറച്ചിട്ട് ഒരു രണ്ട് വർഷത്തിനുള്ളിൽ എന്റെ ലൈഫ് സ്റ്റോറി സിനിമയാക്കാമെന്നാണ് വിചാരിക്കുന്നത്. അതിനെക്കുറിച്ച് ആലോചിക്കുന്നുണ്ടെന്നും’ ധ്യാൻ പറയുന്നു.
