ഷിബു ബേബി ജോൺ നിർമ്മിക്കുന്ന ചിത്രത്തിൽ നായകനാവാൻ മോഹൻലാൽ. മോഹൻലാലിന്റെ അടുത്ത സുഹൃത്തുക്കളിൽ ഒരാളാണ് ഷിബു ബേബി ജോൺ. രാഷ്ട്രീയത്തിൽ സജീവമായ ഷിബു ബേബി ജോൺ സിനിമയിലും സാന്നിധ്യമറിയിക്കുകയാണ്. മോഹൻലാലിനെ നായകനാക്കി പുതിയ സിനിമ നിർമ്മിക്കാനുള്ള തയ്യാറെടുപ്പിലാണ് അദ്ദേഹം. ഇക്കാര്യം ഔദ്യോഗികമായി നടൻ മോഹൻലാൽ തന്നെ അറിയിച്ചിരിക്കുകയാണ്.
ഫെയ്സ്ബുക്കിലൂടെയാണ് സിനിമയുടെ വിവരങ്ങൾ നടൻ പുറത്ത് വിട്ടിരിക്കുന്നത്. ഷിബു ബേബി ജോണുമായി മൂന്നര പരിറ്റാണ്ടുകളുടെ സ്നേഹ ബന്ധമാണെന്നും ആ സൗഹൃദം ഇപ്പോൾ ഒരു സംയുക്ത സംരഭത്തിലേക്ക് കടക്കുന്നുവെന്നും മോഹൻലാൽ ഫെയ്സ്ബുക്കിൽ കുറിച്ചു. ഷിബു ബേബി ജോണിന്റെ പുതിയ നിർമ്മാണ കമ്പനിയായ ജോൺ ആൻഡ് മേരി ക്രിയേറ്റീവും, സെഞ്ച്വറി കൊച്ചുമോന്റെ സെഞ്ച്വറി ഫിലിംസും, കെ. സി ബാബു പങ്കാളിയായ മാക്സ് ലാബും സംയുക്തമായി നിർമ്മിക്കുന്ന ചിത്രത്തിലാണ് താൻ നായകനാകുന്നതെന്ന് മോഹൻലാൽ പറഞ്ഞു. യുവ സംവിധായകനായ വിവേകാണ് സിനിമ ഒരുക്കുന്നത്.
മോഹൻലാലിന്റെ ഫെയ്സ്ബുക്ക് പോസ്റ്റ്,
ശ്രീ ഷിബു ബേബി ജോണുമായി മൂന്നരപ്പതിറ്റാണ്ടിന്റെ സ്നേഹബന്ധമാണ്. ആ സൗഹൃദം ഇപ്പോൾ ഒരു സംയുക്ത സംരഭത്തിലേക്ക് കടക്കുന്ന വിവരം സന്തോഷത്തോടെ പങ്കുവെക്കട്ടെ. അദ്ദേഹത്തിന്റെ പുതിയ സിനിമ നിർമ്മാണ കമ്പനിയായ ജോൺ ആൻഡ് മേരി ക്രിയേറ്റീവും ശ്രീ സെഞ്ച്വറി കൊച്ചുമോന്റെ സെഞ്ച്വറി ഫിലിംസും, ശ്രീ കെ. സി ബാബു പങ്കാളിയായ മാക്സ് ലാബും സംയുക്തമായി നിർമ്മിക്കുന്ന ചിത്രത്തിൽ നായകനായി ഞാൻ എത്തുകയാണ്. യുവസംവിധായകനായ ശ്രീ വിവേക് ആണ് ഈ ചിത്രം ഒരുക്കുന്നത്. ശ്രീ ജിത്തു ജോസഫിന്റെ റാം എന്ന ചിത്രം പൂർത്തിയായതിനുശേഷം ഇതിൽ പങ്കുചേരും. സിനിമയുടെ കൂടുതൽ വിവരങ്ങൾ ഉടൻ തന്നെ നിങ്ങളുമായി പങ്കുവെക്കുന്നതാണ്..
