മൈസൂരു: ഇന്ന് അന്താരാഷ്ട്ര യോഗ ദിനം. മനുഷ്യത്വത്തിനായി യോഗ എന്നതാണ് ഇത്തവണത്തെ യോഗദിന സന്ദേശം. എട്ടാമത് അന്താരാഷ്ട്ര യോഗ ദിനമായ ഇന്ന് മൈസൂരുവിലെ പാലസ് ഗ്രൗണ്ടിൽ നടക്കുന്ന യോഗ പ്രകടനത്തിൽ പ്രധാനമന്ത്രി നരേന്ദ്രമോദി പങ്കെടുക്കുന്നതാണ്.
പ്രധാനമന്ത്രിയുടെ നേതൃത്വത്തിൽ ആയിരക്കണക്കിന് പേരാണ് രാവിലെ ആറരയോടെ നടക്കുന്ന പരിപാടിയിൽ പങ്കെടുക്കുക. ആസാദി കാ അമൃത് മഹോത്സവത്തെ യോഗ ദിനാഘോഷങ്ങളുമായി സംയോജിപ്പിച്ച് മൈസൂരുവിൽ നടക്കുന്ന പരിപാടിയോടൊപ്പം 75 കേന്ദ്രമന്ത്രിമാരുടെ നേതൃത്വത്തിൽ രാജ്യത്തെ 75 കേന്ദ്രങ്ങളിൽ യോഗ പ്രകടനങ്ങൾ നടക്കും. രാജ്യത്തുടനീളം വിവിധ വിദ്യാഭ്യാസ, സാമൂഹിക, രാഷ്ട്രീയ, സാംസ്കാരിക, മത, കോർപ്പറേറ്റ് സ്ഥാപനങ്ങളും കോടിക്കണക്കിന് വരുന്ന ജനങ്ങളും യോഗാ പ്രദർശനം നടത്തും.
യോഗ മാനവികതയ്ക്ക് എന്ന പ്രമേയത്തിലൂന്നിയ ഇത്തവണത്തെ യോഗദിനം വിജയിപ്പിക്കണമെന്നും യോഗയെ കൂടുതൽ ജനകീയമാക്കണമെന്നും പ്രധാനമന്ത്രി ജനങ്ങളോട് അഭ്യർത്ഥിച്ചിരുന്നു. അതേസമയം ആഭ്യന്തരമന്ത്രി അമിത് ഷാ നാസിക് ജ്യോതിർലിംഗ ത്രൈംബകേശ്വര ക്ഷേത്രസമുച്ചയത്തിലും വിദേശകാര്യ സഹമന്ത്രി വി. മുരളീധരൻ തിരുവനന്തപുരം ശ്രീ പദ്മനാഭസ്വാമി ക്ഷേത്രത്തിന്റെ കിഴക്കേ നടയിലും സംഘടിപ്പിക്കുന്ന യോഗ ദിനാചരണത്തിൽ പങ്കെടുക്കും.
